Түркістанда су құбырларының 85 пайызы ескірген. Жергілікті халық осыдан 50 жыл бұрын салынған қойма мен құбырлардан су ішіп отыр. Тіршілік нәріне төлеп отырған ақшамыз қайда кетіп жатыр ? Осы тектес тұрғындардың шағымына тілшіміз Жандос Тастемір жауап іздеп көрді.
Құбырлардан ағатын су кермек татиды. Мұны әсіресе, өзге қаладан келгендер бірден байқайды. Амалы таусылған жұрт оны сатып алып ішуге мәжбүр. Ал оны күн сайын алуға қалтамыз көтере бермейді дейді олар.
Ауыз су сапасына келгенде тұрғындар пікірі қақ жарылды. Бірі су таза десе, екінші тарап қарсы пікір білдіруде. Айтуларынша, шәугім түбіне қақ тұрып, ыдыс-аяқ жууға ғана жарап отыр. Тіпті, осы судан кейбіреулердің шашы түсе бастаған. Ақ халаттылар сапасыз су тұтыну түрлі ауруға шалдықтыратын айтады.
Ардақ Шеңгелбаева, терапевт-дәрігер:
«Теріге тез әжім түседі. Ас қорыту жүйесінде ойық жара пайда болып, дәрет дұрыс жүрмей, тоқ ішек пен тік ішекте, ұйқы безінде зат алмасу процесі бұзылады».
Бұған жауапты мамандардың айтары бар. Мәселе де жақын арада шешімін таппақ. Шаһар тұрғындарын 100 пайыз таза ауыз сумен қамту үшін 5 жылға арнайы инвестициялық жоспар түзіпті. Тозығы жеткен құбырлар жаңартылып, су тазарту қондырғыларын қоюға биыл 3 млн 990 мың қаржы қаралған.
Сейілбек Дайрабай — «Түркістан-Су» МКМ директоры:
«Жарамсыздарын ауыстырдық. 12 сырманы ауыстырдық. Құбырда ақау, апат болған жағдайда тұрғындарды 2-3 күнге сумен қамтуға мүмкіндік бар. Ал жұмыстар толық бітсе, таза сумен үздіксіз қамтамасыз етеміз»
Түйін: Демек, шаһар тұрғындарының таза әрі мөлдір суға қол жеткізетін күн алыс емес. Мекеме басшысы осылай сендіруде. Ең алдымен қала шетіндегі 18 көшеге беріледі. Көпшіліктің ақшасы осы мақсатта жұмсалып жатқан көрінеді.
