Өндірістік жарақат алған түркістандық мердігерден әлі өтемақысын ала алмай жүр. Осыдан 3 ай бұрын қаладағы құрылыс алаңдарында бірінде Бақыт Сәрсенұлының үстіне цемент қалып құлап, аяғын басып қалған. Бүгінде ол жұмысқа жарамсыз. Ал мердігер мекеме жауапкершіліктен жалтарып отыр. Көпбалалы отбасы құрылыс компаниясынан емдік шығынды толық өтеуін талап етіп, біздің арнаға жүгінді.
Төрт метр биіктіктен құлаған бетон оңай ма, Бақыттың аяғы 3 жерден сынған. Әттеген-айы, мердігер мекемемен арада келісімшарт жоқ. Соны пайдаланған олар шу шығармай ауруханаға жеткізіп, операция жасатқан. Тіпті, құзырлы органдарға да хабар бермеген. Ең сорақысы, мердігер мен дәрігер ауыз жаласқан болу керек, «жарақатты өз үйімде алдым» деп Бақытқа қолхат жаздырып алған.
Бақыт Сәрсенұлы, жәбірленуші:
«Дәрігер келіп, бұл жағдай үйде болды деп жазып беріңіз дегені есімде. Қалай жазғаным да білмеймін. Құрылыс басшысы мен дәрігерлер келіскен сияқты. Бала шаға бар, үйде жатып қалдым. Дәрі дәрмекке болсын көмек берсе деймін»
Бақыттың келіншегі Наргизаның әділдік іздеп бармаған жері жоқ. Облыстық сотқа дейін арыз да жазған. Алайда компания басшылары жан-жақтан Наргизаны қыспаққа алып, жазған арызын қайтартып алған. Сөйткен де, олардың отбасына 4 млн теңге төлеуге ауызша уәде еткен. Одан бар болғаны 300 мың теңгесін төлеп, қалған сумманы бермей қашып жүр.
Наргиза Исаметова, Б. Сәрсенұлының жұбайы:
«Отау стройға» және аурухананың атына арыз жаздым. Қыркүйек айында олар үйге келіп, маған 250 мың теңге берді де, «Отау стройдың» атына кір келмесінші» деп айтып кетті. Содан кейін 4 млн теңгені бере алмайтындарын айтты»
Құрылыс компаниясы өкілдері Бақытты келісімшартсыз жұмысқа алған бригадирді жұмыстан шығарамыз деп уәде беріпті. Оқиға болған құрылыстың басына біз де келдік. Алайда, Серік есімді құрылыс бригадирі әлі осында екен. Біздің камерамызға жармасқан одан мынадай жауап алдық.
«Бүгінде Бақытқа төленетін өндіріс жарақаты бойынша облыстық Еңбек инспекциясында акт түзілген. Оның шешімі алдағы апта белгілі болады».
Ал, асыраушысы мүгедек болып қалған Наргиза әлі де әділдіктен үмітті.
