Соңғы жылдары Қазақстанда емес, өзге елде өнер көрсетуді құп көретін жастардың саны артты. Көрші Ресей шоу-бизнесінде де Қазақстандықтардың аты кеңінен шығып, әлем халқын өз шығармашылықтарымен тамсандыруда. Солардың бірқатарын тізбектеп көрдік, деп хабарлайды BAQ.KZ.
1. Азамат Мұсагалиев
Әзіл-сықақшы, тележүргізуші және музыкант. «Сборная Камызякского края» КТК командасында ойнаған. ТНТ арнасында бірнеше жобаларға қатысып, «Однажды в России» шоуында актер, «Где логика?» шоуында жүргізуші, «Интерны» сериалында актер ретінде танылған.
2. Нұрлан Сабуров
Нұрлан Сабуров — ең танымал қазақстандық Stand-up-комик, әзіл-сықақшы және актер. ТНТ арнасындағы Stand Up жобасының арқасында танымал болды. Қазірде осы жобаның тұрақты резиденті және көпшіліктің сүйікті комигі. 2017 жылы Қазақстан және Ресей қалалары бойынша тур жасап шықты.
3. Скриптонит
Ресейдегі ең танымал қазақстандық рэп орындаушысы. 2014 жылы Gazgolder резиденті атанды, кейін Musica36 жеке тәуелсіз лейблының негізін салды. Скриптониттің көптеген туындылары Ресейдің барлық клубтарында, көшелерінде және жастардың телефондарында ойнап жатады.
4. Назима
Назима «Песни» шоуынан кейін Ресейде және ТМД елдерінде танымалдылыққа ие болған Шымкенттен шыққан әнші. Жобада төртінші орын алған орындаушы Black Star лейблымен келісім-шартқа отырды. Орыстілді тыңдармандары мен жанкүйерлері де жетерлік.
5. Yuframe
Yuframe — танымал қазақстандық вайнерлер командасы. Көпшілікті өздерінің позитивті бейнелерімен және әзілдерімен баурап алды. Instagram желісінде команданың үш миллиондық аудиториясы бар. Бүгінде жоба өзінің жұмысын тоқтатты, ал мүшелері жекелей дамып, жаңа жобалар бойынша жұмыс істеуде.
6. The Limba
Қазақстаннан шыққан әнші және әндердің авторы. Ресейде «Обманула» әнінен кейін кеңінен танылды. Бүгінде Andro-мен бірлесіп шығарған «X.O» әні – ТМД-дағы ең танымал әндердің бірі.
7. Айсұлтан Сейітов
Режиссер-клипмейкер. Ресейдің, АҚШ-тың танымал әншілеріне клип түсірумен айналысады. 19 жасында Скриптонит, Ғалымжан Молданазар сынды отандық әншілерге клип түсірсе, сәл кейінірек Ресейдің Иван Дорн, Элджей, Noize MC, Елена Темникова, T-Fest сияқты түрлі жанрда ән айтатын өнер иелерінің клиптерінің авторы атанды. Айсұлтан Nike компаниясының промо ролигінің режиссері атанды. Сондай-ақ әлемнің ең ірі продюсерлік орталықтарының бірі – Partizan-мен келісім – шарт жасасты.
8. Анатолий Цой
Талдықорған қаласының тумасы. «MBAND»тобының жеке орындаушысы болып саналады. «Хочу к Меладзе» жобасының қатысушысы. Жобадан соң Ресейлік тыңдармандардың сүйіспеншілігіне бөленіп, жұлдызы жанды деуге болады.
