Ресейдің ірі банктері «Свифт» жүйесінен ажыратылады. Еуропалық одақ елдері бұл бастаманы бір ауыздан қолдап отыр. Салдарынан Ресейдің қаржы ұйымдары халықаралық операциялар жүргізе алмайды. Одан бөлек, аталған санкцияларға Жапония да қосылды. Соғыс басталғалы бері Ресейдің ең бай бизнесмендері жалпы көлемі 40 млрдқа жуық активтерінен айырылды. Шығынға Украиналық бизнесмендер де батты. Одан бөлек, көптеген Еуропа елдері инвестиция арқылы алған ресейліктердің «Алтын Паспорттарының» да күшін жоятынын хабарлады. Сондай-ақ, осы шабуылда Ресейге үлкен қолдау көрсеткен беларусь басшысы Александр Лукашенкоға да қарсы кезекті санкциялар енгізіледі деп күтілуде.
Жозеп Борелль – Еуропалық одақ бас өкілі:
«Әлбетте, өзге елдермен тығыз байланысқан Ресей банк жүйесін бір түнде күйрету мүмкін емес. Дегенмен, біз оларға барынша көп шығын келетіндей санкция салауды бастадық. Ресей Орталық Банкінің активтерінің жартысы «Үлкен жетілік» елдерінде. Біз оларды бұғаттау туралы да келісімге келдік. Тек Қытайда, ғана олардың активтері сақталады».
Сонымен қатар, Еуропалық Одақ елдері Ресей үшін өз әуе кеңістіктерін жапқанын мәлімдеді. Бастапқыда, тек, Словакия, Польша және балтық теңізі елдері ғана осындай шешімге келген еді. Артынша, Италия, Испания секілді алпауыттардың қолдауымен жалпыеуропалық консенсус орнады. Одан бөлек, Ресейдің басты әуе компаниясы «Аэрофлот» та санкция астында қалды.
Урсула фон дер Ляйен – Еуропалық комиссия президенті:
«Біз Ресей режиміне қатысы бар барлық әуе компанияларының ұшақтарына кедергі қоямыз. Агрессор елдің ұшақтары Еуропалық Одақта ұшпауы тиіс. Оның ішінде, олигархтардың бизнес-джеттері де бар. Айта кетер жайт, осы уақытқа дейін Еуропа елдерінде жұмыс істеп келген Ресейлік Раша тудэй телеарнасының хабар таратуын тоқтаттық. Басты Ресейлік ақпарат құралдарына қарсы да санкция мәселесі шешілуге жақын».
