Облыста болған тұрмыстық жанжалдар Президентті де алаңдатты. Әсіресе, Шорнақ пен Қарабұлақтағы оқиға. Бастысы ұлтаралық қақтығыстың туындамауы. Қазақстан халқы ассамблеясы кеңесінің кеңейтілген отырысында заңсыз шеруге шығатындарға ескерту жасады. Ал араңдатушылыққа жол бергендерді қандай жаза күтіп тұр? Тоқаевтың TikTok-ты қолдауына не түрткі болды? Нұрлан Сұлтанбек баяндайды.
Түркі жұртының рухани ордасында бүгінде тұрғындар саны 2 миллионнан асты. Соның ішінде 50-ге тарта этнос өкілдері өмір сүреді. Сондықтан өңір тұрмыстық дау-дамайдан ада деуге келмейді. Облыс әкімі Өмірзақ Шөкеев жиын басында аймақтағы ахуал жөнінде есеп берді. Баяндаманы тапжылмай тыңдаған Президент жанжалға жол бермеу керектігін ескертті.
Қасым-Жомарт Тоқаев, ҚР Президенті:
«Статистика бойынша Түркістан облысында түрлі тұрмыстық жанжалдар аз емес. Өзіңіз де мысал ретінде Шорнақ, Қарабұлақ елді мекендерінде болған оқиғалар туралы айттыңыз. Тұрмыстық деңгейде болса да дәл осындай жағдайларға баса мән беру керек. Ең алдымен мұндай оқиғалар ұлттық сипатқа ұласпауы қажет».
Ал облыс әкімі өңірде Ассамблея құрамында 34 этномәдени бірлестік пен 9 қоғамдық келісім мекемелері бар екенін айтты. Олар нәтижелі жұмыс атқаруда дейді аймақ басшысы.
Өмірзақ Шөкеев, Түркістан облысы әкімі:
«Бүгінде Түркістан облысында этнос өкілдерінің 92%-ы қазақ тілін жетік меңгерген. Сонымен бірге өңірде этносаралық қатынастар жөнінде карта әзірленіп, түйткілді мәселелер зерделенді. Осы арқылы 2 мыңдай мәселе немесе сұрақтың жауабы табылып, 5000 мемлекеттік қызметкер мен полицейлер, қоғам өкілдері арнайы тренингтен өтті»
Сондай-ақ Мемлекет басшысы TikTok пен Instagram-дағы жобаларға да қызығушылық білдірді. Оның айтуынша, балалардың бос уақыты көп болғандықтан қажетсіз нәрселерге көз жүгіртеді. Бұның алдын алу үшін Ақмола поляк этномәдени бірлестігінің төрағасы Наталья Нагачевская жоба ұсынды.
Қасым-Жомарт Тоқаев, ҚР Президенті:
«Сіздің «Біздің өлке тарихы» TikTok жобасына қатысты ұсынысыңызды қолдаймын. Бұл – жақсы жоба. Қазір жастар негізінен TikTok және Instagram-да отырады, бұл – өмір шындығы. Осы шындыққа сәйкес, балаларымыздың көңіл-күйіне, мәдениетіне және тәрбиесіне оң әсер етейік»
Онлайн режимде өткен отырыста Қасым-Жомарт Тоқаев Түркістан облысында «Достық» үйін салуды тапсырды. Әрбір өңірде халықтар достығына арналған саябақтар да ашылуы мүмкін. Бұдан бөлек, этносаясатқа құзырлы органдар ғана жауап бермей, мемлекет пен қоғам бірлесе жұмыс істемек.
