Қағазбастылықтан әлі де арылмай келеміз. Құжаттарды толықтай электронды нұсқаға көшірмей, олқылықтар ойраңдай бермек. Цифрландырудың онлайнға көшумен шектелмейтінін алға тартқан Президент салаға жауапты министрге шүйлікті. Интернет желісінің сапасы сөз болған комиссия отырысында Мемлекет басшысы сондай-ақ киберқауіпсіздіктің әлсіздігі әбігерге салмас үшін жеке деректерге абай болуды ескертті. Тақырыпты тілшіміз Нұрлан Сұлтанбек тарқатады.
Бәйдібек ауданының тұрғындарын әлсіз интернет әбігерге салды. Жұрт әлеуметтік желіге кірмек түгілі, телефонмен дұрыс сөйле де алмай отырғандарын айтып, мұң шақты.
Сапасыз интернетке қатысты цифрландыру жүйесін енгізу жөніндегі комиссия отырысында да сөз болды. Мемлекет басшысы еліміздегі интернет пен байланыс сапасын сынға алды. Байланыс операторлары интернет параметрлерінің бірін жарнамалайды да, шын мәнінде мүлде басқасын ұсынады, — дейді Президент.
Қасым-Жомарт Тоқаев, ҚР Президенті:
«Маған берілген мәлімет бойынша, тіпті елорданың өзінде, сөз бен істің алшақтығы 40-50 пайызға дейін жетеді. Бұл, шын мәнінде, тұтынушыларды алдау деген сөз. Мұндай өрескелдікті доғару керек. + Біз үнемі Қазақстанның аумағы жүз пайызға жуық интернетпен қамтылды деп айтып жүрміз. Кәнеки мәселенің басын ашып алайық, осы іс жүзінде расталған ақпарат па әлде жоқ па?»
Елімізде киберқауіпсіздік те ақсап тұр. Жыл басынан бері 5 млнға жуық кибершабуылдың жолы кесілген. Бұл көрсеткіш былтыр 2 млннан аспаған екен. Қауіп, әсіресе, азаматтардың банктағы есепшоттары, әлеуметтік төлемдеріне келгенде артты. Сондықтан президент жеке мәліметті қорғауға баса мән беріп, бірқатар тапсырмалар берді.
Қасым-Жомарт Тоқаев, ҚР Президенті:
«Цифрлық инфрақұрылым қалыптастыру мәселесі, оның қауіпсіздігіне деген жауапкершілікті қоса жүктейтінін түсіну керек. Яғни, жеке мәліметтер құқықтық тұрғыдан да, физикалық жағынан да сапалы қорғалуға тиіс. Бұл мемлекеттік жүйелерге ғана емес, мемлекетпен тығыз интеграцияланған жалпы цифрлық экожүйеге де қатысты. Үкімет азаматтардың жеке деректерінің жоғалуына және ұрлануына қатысты жауапкершілікті қатаңдату жөнінде заңнамалық өзгерістер топтамасын әзірлеуі керек».
Алқалы жиында сынның астында қалған Цифрлық дамуға жауапты министр Бағдат Мусинге бірқатар ескерту жасалды. ІТ саласында білікті маманның тапшылығын ескерген Мемлекет басшысы, кадрларды әзірлейтін арнайы мектептер ашуды тапсырды. Енді цифрландыруға жауапты әрбір вице-министр KPI-мен бақыланады. Осылайша кадрлық құрамға баға берілмек.
