Карантин басталып, оқушылар онлайн оқуға көшкенде Білім министрлігінің жарлығымен белгілі бір отбасыларға ноутбук үйлестірген еді. Осы сәтті оңтайлы пайдаланбақ болған мердігер мекеме мемлекеттің 2,5 млрд. теңгесін қалтасына баспақ болған. Осы ақшаға облыстағы мұқтаж отбасынан шыққан балаларға деп 22 мыңға жуық ноутбук сатып алынған. Алайда, бақсақ – бақа екен демекші, тапсырыс берілген техника түгел келгенімен, бірде-бірі талапқа сай болмай шыққан. Бұл іске кімдердің қатысы бар? Тілші материалында.
Бұл – облыстық экономикалық тергеу департаментінің қоймасына түсіріліп жатқан су жаңа ноутбуктер. Әр ауданға үлестірілген техникалар қайта жинақталды. Себебі нұсқауда көрсетілген талаптарға мүлдем сай келмейді.
STAND-UP: Нұрлан Сұлтанбек, тілші:
«Пандемия кезінде қашықтан білім беру технологияларын пайдаланған мердігер облыстық Адами әлеуетті дамыту басқармасынан тапсырыс алған. Техника көлемі – 21 мың 763 дана. Өтінімдегі барлық ноутбукты жеткізгенімен сапасы келісім шартта көрсетілгендей емес.Тіпті жарамсыз деуге де болады. Шағым түскен бұл іске экономикалық тергеп-тексеру департаменті араласып, күдіктілерді бірден қолға түсірді».
Жаңа техниканы жабдықтаушыға 3 млрд. 427 млн. теңгеден астам қаражат бөлінген. Оның 1 миллиард теңгесін істен шыққан техникаға жұмсаған. Күдікті қазір қамауда.
Жандос Кенжебаев, облыс бойынша экономикалық тергеп-тексеру департаментінің тергеу басқармасының басшысы:
«Түркістан облысы бойынша экономикалық тергеп тексеру департаментінің өндірісіне ҚР Қылмыстық Кодексінің 189-бабы 4-бөлігі 2-тармағынан басталған тергеу амалдары жүргізілуде».
Әзірге тергеу қорытындысы белгісіз. Белгілісі бұл оқиғаға бір ғана мердігер араласқан. Ал тапсырыс беруші облыстық Адами әлеуетті дамыту басқармасының бұл іске қаншалықты қатысы бар екені анықталып жатыр.
