Қазақстан Республикасының еңбек сіңірген қайраткері, «Астана Опера» опера труппасының директоры Азамат Жылтыркөзов отандық классикалық вокал өнері тарихында алғаш рет әлемдік деңгейдегі жоба – Винченцо Беллинидің «Пуритандар» операсының CD-дискісіне аудиожазба жасауға қатысты. Жылтыркөзовтен бөлек, шығарманы бельканто-тенор Лоуренс Браунли, сопрано Сара Кобурн да орындады.
Әлемдік БАҚ өкілдері 1953 жылдан бері Delos студиясының жазбаларында осындай үйлесімді әрі стильді ансамбль болмағандығы жайлы жарыса жазды. Одан бөлек, жобаға литвалық солистер де қатысқан болатын. Жазба атақты дирижер Константин Орбелянның сүйемелдеуімен жазылды. Айта кетейік, америкалық дауыс жазу компаниясы 40 жылдан бері жұмыс істейді. Студия жазбалары бірнеше рет «Грэмми» сыйлығына ие болған.
-«Константинмен біз 2017 жылы XIII Халықаралық байқауда танысқан болатынбыз. Байқау скрипка, виоленчель және басқа да классикалық өнер жанрлары бойынша өтетін. Төрт жыл бұрын вокалистерді де қосты. Сол кезде Константин Орбелян әділ қазылар алқасының төрағасы еді. Біздің достығымыз сол кезден басталды. Сол жылы Литвада осы байқаудың жеңімпаздарымен үлкен концетте өнер көрсеттім. Арада біраз уақыт өткеннен кейін Константин мені «Пуритандардың» жазбасына шақырды. Бұл мен үшін үлкен тәжірибе. Тәуелсіз Қазақстанның тарихта алғаш рет маған Беллинидің «Пуритандарының» жазбасына қатысу бақыты бұйырды.»,-деп ағынан жарылды Азамат Жылтыркөзов.
Сондай-ақ ол аталмыш шығарманың бірлі-жарым нұсқасы ғана бар екенін атап өтті. Бұл шығарманың опера өнерінің биік шыңы, бельканто шедеврі екенін де қоса айтты. Бұл Қазақстанның опера өнерін қоса алғанда, күллі әлем үшін маңызды жайт. Эксклюзивті диск мұқабасында отандық әншінің аты жазылады. Опера 2017 жылы жазылғанына қарамастан, биыл күзде шығады деп жоспарлануда.
