Коронавирустың жаңа штамы пайда болды. Ғалымдар «Омикрон» деп атаған түрімен алғаш Оңтүстік Африка Республикасынан Нидерландыға ұшып келген 13 адам тіркелген. Осыған байланысты Еуропа елдері мен АҚШ-та Африкамен әуе байланысын уақытша тоқтату мәселесі талқылануда. Өйткені індеттің бұрынғы түрлерінен он есе қауіпті көрінеді.
Мұны ести сала, Швейцария шұғыл түрде техникалық жиын өткізді Оған Дүниежүзілік Денсаулық Сақтау Ұйымының өкілдері және коронавирусты бақылаушы тәуелсіз топ мүшелері қатысты. Мамандардың айтуынша, қараша айының ортасында Оңтүстік Африка Республикасында коронавирус жұқтырғандар саны күрт артқан. Бұл штамм өзгелерден қарағанда, бірнеше есе көп мутацияға ұшырайды. Сондықтан төндірер қаупін тіпті болжаудың өзі қорқынышты.
Мария Ван Керхове, ДДСҰ коронавирус бойынша техникалық жетекші:
«Өкінішке орай, бізде ақпарат әлі аз. Оңтүстік Африка Республикасы және өзге де Африка елдерінде зерттеу жұмыстарын бастап кеттік. Ақпарат алған кезде бірден барлық әлем елдеріне таратамыз. Қазір біз әлемнің кез келген нүктесінен ақпарат алу мүмкіндігін қалыптастыру үшін жұмыс істеп жатырмыз. Біздің техникалық топ жиі кездесетін болады. Әрине, адамдар алаңдап жатқанын түсінеміз. Сондықтан, қарапайым қауіпсіздік шараларын ұстанған жөн».
Осы аптадан бастап АҚШ Оңтүстік Африка Республикасы және африканың өзге 7 елімен әуе қатынасын тоқтатпақ. Байдан әкімшілігі енгізген шектеулерді көпшілік қолдауда. Себебі, омикрон адам ағзасына қалай әсер ететіні зерттеліп үлгермеді.
Энтони Фаучи, АҚШ Ұлттық аллергия және инфекциялық ауру институтының директоры:
«Омикрон» мутация нәтижесінде қауіпті болуы мүмкін. Ол адамдар алған вакцинаны да айналып өтуі мүмкін. Біз бұған дайын болуымыз тиіс. Сондықтан, кейбір мемлекеттермен әуе қатынасын тоқтатқанымыз жөн. Сонда сәл де болса уақыттан ұтамыз. Осыған байланысты ревакцинация қажет болуы ғажап емес».
Оңтүстік Африкада пайда болған вирустың бұл түрі Израиль мен Еуропаның бірқатар елдерінде де анықталды. Сондай-ақ Ұлыбритания, Италия, Чехия, Германия және Бельгияда бой көрсетіп үлгерген. Сондықтан әлем елдері «Омикрон» тіркелген елдерден келетін ұшақтар санын жаппай шектеп жатыр.
