Нұр-Сұлтанда Жұмабек Ташенeвке ескерткіш ашылды

Ел тәуелсіздігінің 30 жылдығы қарсаңында елордада мемлекет қайраткері Жұмабек Ташеневке ескерткіш ашылды. Ескерткіш сәулетшісі – Қ.Қорғанов, мүсінші – Е.Ержанов. Мүсін қоладан, тұғыры граниттен құйылды, ескерткіштің жалпы биіктігі 8,2 метр.
Мемлекетшіл тұлға, экономика ғылымының кандидаты Жұмабек Тәшенев өзі басшылық еткен жылдары республиканың саяси, экономикалық, мәдени дамуына, қазақ мемлекетінің аумақ тұтастығын сақтау жолында еңбек етті.
Республиканың саяси, экономикалық, мәдени дамуына басшылық жасаған жылдары қазақ мемлекетінің аумақ тұтастығының сақталуына көп еңбек сіңірді.
Ол Оңтүстік Қазақстан облысының Бостандық, Мақтаарал аудандарын өзбек еліне беруге, Маңғыстауды Түрікменстанға қосу жөніндегі ұсыныстарға тойтарыс берді.
Тың өлкесіне біріктірілген солтүстік облыстарды Ресейге, Оңтүстік Қазақстанның мақта егетін аудандарын Өзбекстанға беруге қарсы шықты.
Қазақстан жерінде ядролық жарылыстар жасауға қарсылық білдірді.
Шығармашылық одақтар өкілдеріне үй-пәтер бергендігі үшін Алматының ортасында “қазақ ауылын” құрды деп айыпталды. “Қазақ әдебиеті” газетін жабудан, “Социалистік Қазақстан” газетін “Казправданың” аудармасы етіп шығарылу қаупінен қорғап қалды. “Ұлтшыл” деп айыпталып, Н.Хрущевтің нұсқауымен қызметінен босатылды.
1961-1975 жылдары Шымкент (қазіргі Оңтүстік Қазақстан) облысы атқару комитеті төрағасының орынбасары болды. 1975 жылы одақтық дәрежедегі дербес зейнеткерлікке шықты.
Өмірінің соңғы кезеңінде “Қаракөл” ғылыми-зертханалық институтында, Түркістан облысы талдау-есептеу орталығында қызмет атқарды. Ленин, Еңбек Қызыл Ту, “Құрмет белгісі” ордендерімен марапатталған.
Атап өтейік, осыған дейін Нұр-Сұлтанда ұлы тұлғаға көше аты берілген болса, жуырда мектепке есімі қойылған. Енді міне кезек ескерткішке келіп отыр. Қайсар тұлғаның мүсіні комиссия мүшелерінің, зиялы қауым өкілдерінің, ұрпақтарының келісімімен құйылған.