100 мыңға жуық мүмкіндігі шектеулі азамат тұратын Түркістан облысында бірде-бір сауықтыру орталығы жоқ. Ақылы ем де қабылдай алмайды. Себебі, кембағал жандарға төленетін жәрдемақының көлемі бар болғаны 36 мың мен 70 мың теңгенің аралығында. Көмекке мұқтаж жандардың шешілмеген мәселесі мұнымен бітпейді.
Кентаулық Зухра Нұрмұхамедова он жылдан бері мүгедек бағып отыр. Дәрі-дәрмегі мен қажетті заттарды айтпағанда, сал адамды далаға серуендетудің өзі ауыр, азап.
Зухра Нұрмұхамедова — жеке көмекші:
«Беретіні екі памперс, оны неге жеткіземін. Мысалы бір күнде үш төртеуін қолданамыз. Далаға шығарайын десек детский коляска беріп тұр да. По размеру ол коляскаға сыймайды да, далаға шыға алмай отыр».
Кентауда он мыңға тарта мүгедек бар. Тиісінше түйткілдері де шаш етектен. Мәселен оларға бар болғаны үш ақ инватакси қызмет көрсетеді. Оның өзін сағаттап күтуге тура келеді. Ал, бағдаршамдар зағиптарға арналмаған. Жанарынан айырылғандарға ойдым-ойдым жолда жүру тіпті қиын. Ғимараттарда пандус жоқ. Барының өзі талапқа сай емес.
Кембағал жандар оңалту мекемелеріне бір ретте барып көрмеген. Өйткені жүз мыңға тарта мүгедек тұратын облыста арнайы орталық деген атымен жоқ. Ал, ақылы ем алуға жәрдемақысы жетпейді.
Дүйсенәлі Жүсіпов- «Мүгедектер қоғамы» қоғамдық бірлестігінің төрағасы:
«Бірінші топтың мүгедегі алатыны 69 мың теңге. Екінші топ мүгедегі 63 мың алады. Ештеңеге бара алмайды ондай ақшамен. Шынын айтса өз семьясын да асырай алмайды».
Нұрлан Болғаныс — 1-ші топтағы мүгедек:
«Мысалы бізге қолдануға берілетін телефондар сөйлейтін программасы көтере алмағандықтан, ол затты пайдалана алмаймыз. Флеш плеер дейді, ол заттар сөйлемейді. Олардың дауысы жоқ та негізі. Дауыссыз алғаннан кейін қолдануға келмейді ол заттар».
Ал,мүгедектердің жеке көмекшілері айына 50 мың теңге алады. Тіпті, еңбек өтілі де есептелмейді.
Жазира Жанасбаев — жеке көмекші:
«Ешқандай ештеңеге жетпейді базарға барсаң елу мыңға. Не медстрахование жүрмейді. Не пенсионный жүрмейді».
Жауаптылар жәрдемақыны көбейтуге жергілікті бюджетте қаржы жоқ екенін айтады.
Нұржан Нұрашев — Түркістан облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары:
«Республика көлемінде атқарылатын жеке көмекшілердің айлығын көтеру жөнінде де ұсыныс түскен. Мына памперстердің санын көбейту жөнінде ол мәселе де республика бойынша бүгінгі таңда қаралу үстінде».
Басқармадағылар болса оңалту орталығын келер жылы ашамыз дейді. Қаражат бөлінсе, екі жүз орынды кешен құрылысы биыл басталмақ.
