Мәжілісмендер «Рақымшылық жасау туралы» заң жобасын бірауыздан мақұлдады. Енді мың адам бостандыққа шығады. Бұл ізгілікті іс ҚР Тәуелсіздігінің 30 жылдығы қарсаңында жүзеге аспақ.
Бүгінде Қазақстандағы 64 түзеу және 16 тергеу изоляторында 34 мың адам бар екен. Оның 30 мыңына сот үкімі шыққан. Қалған 4 мыңына қатысты тергеу жүріп жатыр. 93 пайызы – ауыр немесе аса ауыр қылмыс үшін жазасын өтеушілер. 45 пайызы – осыған дейін істі болғандар. Тағы 32 мың адам пробациялық бақылауда. Рақымшылық ардагерлерге, кәмелет жасына толмағандарға, 1-2 топ мүгедектеріне және қоғамға зияны болмайтын өзге азаматтарға қолданылады.
Ерлан Тұрғымбаев, ҚР Ішкі Істер министрі:
«Жоба бойынша 2236 сотталушыға, 11 310 пробацияда тұрған адамға рақымшылық жасалынады. Нәтижесінде 1000 адам бостандыққа шығады. 3818 адам пробациялық бақылаудан босатылады. Екіншіден, 1294 сотталушыға, 7492 пробацияда тұрған азаматтарға жаза мерзімі қысқарады».
