Түркістан қаласында химия-биология бағытындағы Назарбаев Зияткерлік мектебі ашылды. 720 оқушыға шақталған білім ордасының ресми ашылу салтанатына Қазақстанның және Өзбекстанның Үкімет басшылары қатысты. Аталған нысан Түркістан облысын әлеуметтік-экономикалық дамытудың 2021-2025 жылдарға арналған Кешенді жоспары аясында салынып отыр. Толығырақ тілші репортажында.
Түркістандықтар ашылуын көптен күткен мектеп лентасын премьер-министр Асқар Мамин және Өзбекстан Республикасының үкімет басшысы Абдулла Ариповтің өзі қиды.
Жаңа мектептің ғимараты 23 мың шаршы метр аумақты алып жатыр. Мұнда 120 балаға арналған жатақхана, 360 орындық асхана, 15000-нан астам кітап қоры жинақталған кітапхана мен түрлі спорт кешендері бар. Бір сөзбен айтқанда, баланың білім нәрімен сусындауына барлық жағдай жасалған.
Балқан Қасымов, Түркістан қаласындағы Назарбаев Зияткерлік мектебінің директоры:
«Бүгін Түркістан қаласында үлкен тарихи оқиға болып жатыр. Назарбаев мектебінің ашылуы облыстың түкпір-түкпіріндегі дарынды балалардың заманауи білім алуына негіз болмақ. Болашақта осы мектептің түлектері еліміздің әлеуетін көтерер білікті азаматар болады деп сенемін».
Дарынды балаларға заманауи тұрғыда білім беруге 42 білікті педагог іріктелген. Олардың 18-і – еліміздің басқа аймақтарындағы Назарбаев Зияткерлік мектептерінен ауысып келген тәжірибелі ұстаздар. Олардың арасында «Болашақ» бағдарламасының түлектері мен шетелден келген модератор-мұғалімдер де бар.
Бауыржан Ілиясов Түркістан қаласындағы Назарбаев Зияткерлік мектебінің директоры оқу ісі жөніндегі орынбасары:
«Басқа Назарбаев мектептерінен ерекшеленетін бізде ақпараттық орталықтар, қазіргі замандағы Қазақстан кабинеттері, кабинет экономики региона, интеграция кабинеттері, жалпы қазақ тілінен сөйлеу, жазу, тыңдау дағдыларын дамытатын кабинеттер ашылған».
720 оқушыға арналған заманауи мектепке бүгінде 360 оқушы қабылданып үлгерді. Білім ордасында олардың тек сапалы білім алып қана қоймай, жан-жақты дамуына да жағдай жасалған. Атап айтсақ, телестудия, STEM, инжиниринг, робототехника, агро зертхана, ақпарат тарату алаңы, саз өнері мен хореграфия сынды үйірмелер бар.
