Түркістандағы әйгілі «Керуен сарай» кешенінде балмұздақ сататын кәсіпкер күніне 1000 долларға жуық табыс табады. Мереке күндері табысы одан да жоғары.
«Сауда өте жақсы. Демалыс күндері мың доллардың үстінде пайда табамыз. Еңбегімізді ақтауда. Балмұздақ бағасы қаладағы бағамен бірдей, қымбат емес. Келушілер көп, демалыс күндері ине шаншар орын болмайды. Облыс әкімдігі жеңілдіктер ұсынып, 4 пайызбен несие береді. Соны пайдаланатын боламыз»,- дейді жеке кәсіпкер.
Қазіргі таңда туристік кешендегі сауда орындары халыққа қызмет көрсете бастады. Бұл жерде әйгілі брендтер жұмыс істеуге қызығушылық танытуда. Облыс әкімі Өмірзақ Шөкеев кешенде ашылған жаңа сауда орындарының жұмысымен танысу үшін Керуен Сарайды аралап шығып, жаңадан ашылған «Magnum» супермаркетінде болды.
Айта кетейік, «Керуен сарай» кешеніндегі сауда орталығының аумағы 23 мың шаршы метрден асады. Бұл кафе, ресторан және киім -кешек саудасына арналған. Соның 54% ашылуға дайын. Одан бөлек, тағы 20% -мен келіссөздер жүргізілуде.
Бұдан бөлек, Түркістан облысы әкімінің тапсырмасына сәйкес, инвесторларға сауда нүктелерін жалға алуға жеңілдік беру үшін арнайы «Түркістан» әлеуметтік — кәсіпкерлік корпорациясы арқылы «Яссы бизнес» несие беру жобасы ашылған болатын. Кәсіпкерлерге 27 млн. теңгеге дейін 4 пайызбен 5 жылға дейін кредит беріледі. Яғни кәсіпкерлер несие алып, жөндеу жұмыстарына, өз қажетіне пайдалануға толық мүмкіндіктері бар. Қазіргі кезде сауда орталығына қызығушылық танытып жатқан кәсіпкерлер көп.
