Түркістанның басты туристтік орындарының бірі — Қожа Ахмет Яссауи кесенесінің маңы биыл ғана толықтай жөндеуден өтіп, келушілерді қызықтыра түсті. Алайда киелі орынды тамашалауға келгендер әжетхана таппай әлек. Мәселеге әкімдіктің әлі күнге неге атүсті қарап отырғаны түсініксіз. Мәселені Алтынбек Әмит анықтап көрді.
Түркі жұртын қызықтыратын Қожа Ахмет Ясауи кесенесінің маңында да бірде-бір талапқа сай келетін дәретхана жоқ. Біз сұхбат алған туристердің көбі осылай шағымданады. Осының кесірінен рухани астананы тамашалауға келген қонақтар әжетхана іздеп сандалуға мәжбүр.
БЛИЦ-САУАЛНАМА:
«Әжетхана іздеп жүргеніме бірәз болды. Әлі таппадым…»
«Ана жер, мына жердің барлығын көрдік. Бірақ барлық дәретхана жабық…»
Атқамінерлер мәселені шешуге асықпайтын секілді. Айтуларынша дәретхана сенімгерлік басқаруға өтуі керек екен. Ал, ол жұмыс едәуір уақытты талап етеді. Қала әкімінің БАҚ өкілдеріне есеп беру жиынында да бұл проблема көтерілді. Әжетхананың жыры әбден шаршатқан ба, әйтеуір Нұрбол Тұрашбеков сұрақ қойған журналистке атүсті жауап берді.
Нұрбол Тұрашбеков, қала әкімі:
«Бұл мәселемен айналысып жатырмыз…»
Әзірге әжетхана іздеп сабылған туристерді Сапар орталығы құтқарып тұр. Дегенмен ол да мыңдаған келушіні қабылдауға қауқарсыз.
Өткір Амангелдіұлы, Сапар орталығының директоры:
«Екінші қабаттағы әжетханалар қызметкерлерге арналған. Ал астынғы қабатқа туристер келеді. Онда дәрет алуға да жағдай жасалған…»
9 айдан бері Түркі жұртының астанасын көруге миллионнан астам турист келген. Қаладағы 11 киелі, 6 рухани-мәдени нысан мен 4 туроператор келушілерге өз қызметін ұсынуда. Алайда, дәретхананың дауы жақын арада шешілмесе, туризм саласы үлкен сынға ұшырауы мүмкін.
