Өйткені Тәуелсіздікке 30 жыл толса да, елімізде заманауи туындыларды брайль қарпінде шығаратын бірде бір баспахана жоқ. Қолда бар оқулықтардың да мұқабасы мүжіліп, бедері бүлініп, әбден тозығы жеткен. Көзі көрмейтін алайда көкірегі ояу жандардың базынасын тілшіміз жеткізді.
Ержан Ибрагимовтың 21 ғасырда Ленинді мадақтаған өлеңді оқып отырғандығын көріп түсінбестік туындауы мүмкін. Алайда зағиптарға арналған кітапханадағы қазақ тілді санаулы туындының бірі – осы. Заманауи туындылармен танысқысы-ақ келеді азаматтың. Әттең тонның келтесі… Тұтас Қазақстанда әлі күнге көзі көрмейтін жандарға арналған кітап шығаратын бірде-бір баспахана жоқ.
Ержан Ибрагимов, көзі көрмейтін және әлсіз көретін азаматтарға арналған кітапхана қызметкері:
«Орысша кітаптар көп бізде, қазақ тілде аз. Себебі СССР кезінде орталықтандырылған типография бар еді. Үлкен типография. 3 қабатты. Алматыда. Оның ішінде қазақша кітаптарды басып шығаратын. 90 жылдары ол типография сатылып кетті да типография жоқ бізде».
Ержан Ибрагимов сынды зағиптар Қазақстанда 100 мыңдап саналады. Оның мамандандырылған кітапханаларға тіркелгені – 33 мың. Ал бұдан бөлек тағы 8 мыңнан астам оқушының көру қабілеті нашар екен. Олар мамандандырылған баспахананың жоқтығынан кеңестік үкімет тұсында жарық көрген орыс тілінде жазылған кітаптарды оқуға мәжбүр. Мәжілісмендер алдағы 3 жылдық бюджетті бекітерде баспахана салу ісінің тағы жоспарға енгізілмегенін айтып қынжылды.
Мақпал Тәжмағамбетова, ҚР Парламенті Мәжілісінің депутаты:
«Әр жолы сіздер зағиптардың мемлекеттік және заманауи тілдердегі әдебиеттерге толыққанды қол жеткізу үшін дербес мамандандырылған баспахана ашу қажеттігін айтқан болатынсыздар. Алайда барлық кезде де шешім қабылдау кейінге ысырылып келеді».
Мемлекет басшысы биылғы жолдауында инклюзивті қоғамды дамыту қажеттігін айтты. Яғни, мүмкіндігі шектеулі азаматтардың барлық жағдайы жасалуы тиіс. Президент бұл тақырыпты алғаш қозғап отқан жоқ. Әйтсе де біткен істен бітпегені басымдау секілді.
Нұрғиса Дәуешов, ҚР Мәдениет және спорт министрінің орынбасары:
«Бедерлі нүктелі шрифтті баспахананы ашу бойынша қазіргі таңда шет мемлекеттердің тәжірибесі зерттелді. Оған арнайы осы саланың мамандары 22-24 жылдардағы бюджетті нақтылау кезінде ұсыныс береміз».
Министрлік өкілі болашақта салынатын баспахана барлық оқырманның сұранысын қамтиды деп сендірді. Әйткенмен сөзін салмақтасақ ол күнге дейін әлі бірнеше жыл қажет секілді.
