Түркістан облысы Жетісай қаласында су жүйесі әбден тозған. Шіліңгір шілдеде тұрғындар тіпті қаталап шөлдейді десе де болады. Себебі көпқабатты үйлерге айлап су берілмей қалатын кездер де болады. Мәселені толығырақ Әлия Мұхтарқызы тарқатады.
Жетісай қаласының су жүйелері өткен ғасырдың 60 жылдары 20 мыңдай тұтынушыға есептеліп салынған. Содан бері күрделі жөндеу көрмегендіктен, құбырлар тесіліп, су азайып кеткен. Халық саны екі жарым есеге көбеюіне байланысты су сорғылары да істен шыға бастаса керек.
Берік Мәмбетов, Жетісай аудандық ТҮКШ бөлімі басшысының орынбасары:
«Көпқабатты тұрғын үйлерге дәл қазір су жеткізіп бере алмай отырмыз. Себебі біздегі тұрған насостардың қысымы төмен. Биыл шілде айында жерасты суларының тартылуына байланысты наостарымыз күйіп кетті».
Осы проблеманы ескерген жергілікті билік биыл ескі су жүйелері мен құбырларды жаңартуды қолға алды. Республикалық бюджеттен бөлінген 695 млн теңгеге 200 мыңға жуық шақырым ауыз су құбырлары тартылып, сыйымдылығы 2600 текше метр болатын 2 су торабы салынуда. Қосалқы станса мен 2 су көтергіш стансасы да іске қосылмақ. Өз кезегінде жылдар бойы тіршілік нәрінен тарыққан жұрт бұл жұмыстарға ризашылығын білдірді.
Сатылхан Өтеулиев, Жетісай қаласының тұрғыны:
«Отыз жылдан бері суды көршілерден тасып ішетін едік. Жаздың күні суды көп талап ететін кезі, қыстың күні қиналсақ та тасып ішетін едік. Енді қазір су тартып жатыр. Үкіметке рахмет, жақын арада су келіп қалатын шығар деп күтіп отырмыз»
Ауқымды жобаны жүзеге асыруға бас-аяғы 3 млрд теңге жұмсалмақ. Қалған қаражат келер жылы бөлініп, 2023 жылы қала тұрғындары толықтай «Абай» топтасқан су жүйесімен қамтылады деп күтілуде. Аудан басшылары болса қазір елдімекендердегі ауыз су проблемасы да кезең-кезеңімен шешіліп жатқанын айтады.
Мұрат Қадырбек Жетісай ауданының әкімі:
«7 елдімекені экономикалық жағынан тиімсіз деп танылған шалғайда орналасқан. Биыл жергілікті бюджеттен біз 8 ауылдық округке су жүйелерін жөндеу үшін 200 млн теңгеге жуық қаржы бөліп, бүгінгі күні ол жұмыстарды жүргізіп жатырмыз»
Жалпы аудандағы 113 елдімекеннің бүгінде 103-іне орталықтандырылған ауыз су құбыры тартылған. Санитарлық аймақтарында 80-нен астам ұңғыма істеп тұр. Өзгелерінде ескі су жүйелері жаңартылып, тозығы жеткендері толығымен ауыстырылуда.
