Қазірдің өзінде Шымкент қаласы бойынша 50 мыңға жуық азамат үй кезегінде тұр. Биыл оның аз қамтылған 237-сі баспанаға қол жеткізді. Сондай-ақ 682 азамат арендалық баспанамен қамтылды. Бұл жылдағы көрсеткіштен аз дейді мамандар. Оның себебін шаһардағы тұрғын үй жетіспеушілігімен байланыстырады. Бұл мәселені жауаптылар қалай шешіп жатыр екен? Нұрлан Сұлтанбек тарқатады.
Несиелік негізде баспанамен қамту үшін түрлі мемлекеттік бағдарламалар бар. Соның арқасында 1285 азамат қоныс тойын тойласа, 233 отбасыға жергілікті бюджет есебінен алғашқы жарнасын төлеуге көмек берілді. Осылайша өңірдегі баспана мәселесін кезең-кезеңмен шешіп жатырмыз дейді, — жауаптылар.
Жұлдызай Ордабекова, Шымкент қаласы тұрғын үй басқарма басшысының міндетін атқарушы:
«Жалпы біз республика бойынша жаңалық күтудеміз. Ол тек қана Шымкент қаласын қамтиды деп ойламаймын. ҚР бірнеше заңнамалық актілеріне дәл осы тұрғын үй саласы бойынша өзгерістер енгізуде. Ол жерде бірнеше өзгерістер енгізіледі деп жоспарланып жатыр. Біз жұртты содан соң ғана хабардар ететін боламыз».
Жалпы Шымкент қаласы бойынша бүгінгі таңда тұрғын үй алу тізімі негізінде 6 бөлік тізіммен жүргізу керек. Алайда бізде Екінші дүниежүзілік соғысының ардагерлері түгел дерлік баспанамен қамтылғандықтан, ол 5 тізіммен жүріп жатыр. Бүгінгі таңда тұрғын үй алу бойынша тізімде 47077 азамат тұр. Бұл көрсеткіш жыл басында 42 мың болса, содан бері 5 мың адам қосылып отыр. Оның ішінде жетім және ата-анасының қамқорсыз қалған балалар 1787 баланы құрайды. Ал көп балалы отбасы 8895 азаматты, халықтың әлеуметтік жағынан әлсіз тобы 16157 азамат, мемлекеттік қызметшілер 20211 азаматты құрайды. Сондай-ақ, 27 азамат апатты үйде.
Бұған дейінгі пайдаланудағы тұрғын үйлерге жөндеу жұмыстарын жүргізу де назар тыс қалмаған. 11 көпқабатты үй бастан-аяқ жөнделсе, оның 25-ін ретке келтіру басталып кеткен. Ал мүлдем жөндеуге келмейтін 107 тұрғын үйді бұзып, тұрғындарды басқа жаққа көшірілуде. Олар баспанасыз қалмайды екен.
Жұлдызай Ордабекова, Шымкент қаласы тұрғын үй басқарма басшысының міндетін атқарушы:
«Бүгінгі таңда тұрғын үймен қамтамасыз етудің бірнеше жолы бар. Олар: арендалық және несиелік тұрғын үй. Төлем қабілеті төмен азаматтардың сатып алу құқығынсыз жалдамалы пәтер күтуге мүмкіндігі бар. Ал несиелік негізде ниет білдіретін азаматтар оларға 2 пайыздық «2-10-20», яғни, «Бақытты отбасы» бағдарламасы, «5-10-20» – «Шаңырақ» бағдарламасы және «5-20-25», «7-20-25» бағдарламалары қарастырылған».
Еліміздің үшінші мегополисінде баспана мәселесі осындай шешім табуда. Жаңа пәтердің кілтіне қол жеткізгендердің қатары да артып келеді. Бүгінде қазақстандық нарықта ипотекалық бағдарламалар да көбейген. Осы негізде елімізде 10-нан астам бағдарлама тұрғындар игілігі үшін қызмет көрсетуде.
