Енді Қазығұрт ауданына қарасты бірнеше ауыл отын тасып, көмір жағып күнелтпейтін болады. Себебі Қызылсеңгір, Тұғыртас, Заңғар, Қақпақ, Сырлысай ауылдарына табиғи газ берілді. Көп жылдар бойы көгілдір отынға қол жеткізе алмай келген жұртшылықтың қуанышында шек жоқ. Аудан басшысы алдағы уақытта қалған ауылдарға газ кіргізу жоспарда екенін айтты.
Көгілдір отынның келгеніне ерекше қуанғандардың бірі – он баланың анасы Гүлшат Бапанова. Балдаққа сүйенген келіншек үшін от жағып, күл шығарудың тауқыметі өз алдына. Қала берді, көмір алуға кеткен қыруар қаражатты айтсаңшы.
Гүлшат Бапанова, тұрғын:
«Жұмысымызды жеңілдетті. От жағып, көмір тасушы едік. Енді бір бұрап қалсақ болды, газ жанып, тамақ пісіп жатыр. Қуанышымызда шек жоқ».
Фатима Қалмұратова, тұрғын:
«Көгілдір отын келіп, бізді қуантып отыр. Неше жылдан бері, от жағып, күл шығарып, көмір тасып әбіржіп жатушы едік. Мінекей қуанышымызда шек жоқ».
Қызылсеңгір, Тұғыртас, Заңғар, Қақпақ, Сырлысай ауылдарына газ келді. Аталған ауылдарға біршама жыл дайындау және жөндеу жұмыстары жүргізілді. Нәтижесінде, биыл көгілдір отынға қосылуға мүмкіндік туған.
Арман Абдуллаев, аудан әкімі:
«Келесі кезекте бізді Шарапхана ауылдық округіне қарасты Майлыошақ, Алтынтөбе ауылдық округіне қарасты Аққұм елді мекендеріне газ қосамыз биыл. Сонда біздің 48 елді мекенінің тұрғындары газ тұтынатын болады».
Бүгінде аудандағы 61 елді мекеннің 44-і көгілдір отынмен қамтылған. Алайда, газ жүйесі жүргізілген 44 елді мекеннің 41-і табиғи газды пайдалануда.
