Түркістанды жасыл желекке айналдырып, климатын реттеу үшін шаһар 32 секторға бөлінген. Әрқайсына жауапты ретінде аудан, қала әкімдіктері мен облыстық басқармалар бекітілген. Олар көшеттерді отырғызып қана қоймай, шыбықтардың тамыр жайып, көктеуіне де жауапты. Десек те, жұмыс жүйелі жүріп жатыр деуге келмейді. Себебі ағаштардың жайқалып тұрғаны шамалы. Көбі көктемей жатып, қурап кеткен. Мұның себебін тілшіміз Жандос Тастемір біліп келді.
Тұрғындардың шырылдайтындайы бар. Мына өскіндер осыдан екі ай бұрын егілген. Бірақ содан бері суғарылмаған. Топырағы қатты. Ал, мәңгі жасыл ағаш — шырша, арша ағаштары тіпті күз түспей жатып, сарғайып кеткен. Оның қурағанын білдірмес үшін, біреулер түбінен кесіп тастапты.
2019 жылы қалада 186 мыңнан астам ағаш болған. Үш жылда ол 555 мыңға жеткен. Алайда, бүгінде соның 35 пайызға жуығы қурап қалған. Мұны ақ жағалылар да растап отыр. Себебін климаттың қолайсыздығымен түсіндіріп бағуда. «Құрғақ, аптап ыстық әрі үнемі аңызақ жел азынап тұратын жерде жасыл желекті жайқалту оңай шаруа емес», — дейді олар.
Көркемжан Ешметов, «Жасыл Түркістан» КММ директоры:
«30 мыңға жуығы қурап кеткен болатын, алдағы күзде соны реттейтін болады. Қазір ағаш егетін орындар дайындалып жатыр. Қазан айының ортасына қарай еге бастайды».
Ал, қала тұрғыны Рысты Әметова бұл оймен де келіспейді. Өйткені, көшедегі талға обал болмасын, еңбек зая кетпесін деп баласындай мәпелеп қарайды. Немерелеріне әр ағаштың түбіне шелекпен су құйдырады.
Рысты ӘМЕТОВА, «Бөген-2» көшесінің тұрғыны:
«Аймақты жасыл желекке айналдыру үшін алдымен қаланың әр тұрғыны жанашырлық танытуы тиіс».
Жауаптылар қураған ағаштардың орнына жаңасын отырғызатынын айтуда. Жыл соңына дейін бақтардан арнайы алынған 16 түрлі ағашты егу жоспарда бар.
