Арыстық шаруалар жеңілдікпен жанармай алуда

Күзгі дала жұмыстарына мемлекет тарапынан жеңілдікпен жанар-жағармай өнімдері шаруаларға бөлініп жатыр.
Осы мақсатта биыл Арыс қаласына облыстық ауыл шаруашылығы басқармасы тарапынан жанар-жағармай бағасы 170 теңгеден бекітіліп, 1 690 тонна лимит бөлінген болатын. Қазіргі кезде шаруаларға бөлінген жанармайды жеткізуші оператор ретінде «ҚазПетройлТрейд» және «Sanali group» ЖШС-і бекітілген.
Сол себепті жеңілдікпен берілетін жанар-жағармайды алу үшін шаруалар алдын-ала қамдануда. Яғни, шілде айының басында үміткер шаруалар белгіленген жанармай мөлшерін өз ауыл әкімшілігіне өтініш беруі тиіс. Ал әкімшілік Арыс қалалық ауыл шаруашылығы бөліміне тізім ұсынады.
Айта кетейік, егін шаруашылығына керекті жеңілдетілген жанар-жағармай тауар өндірушілерге екі маусымда, яғни көктем мен күзгі дала жұмыстарына беріледі.