Еліміздің бас санитар дәрігері Ерлан Қиясов өткен аптада Қытайдан келген Vero Cell вакцинасын салу туралы қаулыға қол қойды,- деп хабарлайды TurkistanZaman ақпараттық порталы сoronavirus2020kz-ке сілтеме жасай отырып.
Жаңа қаулығы сәйкес, вакцина 18 жастан асқан ересек адамдарға салынады.
«Құтыда екі рет егуге арналған 1,0 мл өнім болады, әрбір доза үшін 0,5 мл қажет. Бір адамға бірден 1.0 мл вакцинаны салуға тыйым салынады. Вакцинациялау кестесі бойынша екі дозаның аралығы 21-28 күн болуы керек», — делінген қаулыда.
Егер де азаматтардың вакцинаның кез-келген компонентіне (оның ішінде қосымша заттарға) аллергиясы бар болса, бақыланбайтын эпилепсия немесе жүйке жүйесінің басқа да үдемелі аурулары болса вакцинадан бас тартуы керек. Сондай-ақ анамнезінде Гийен-Барре синдромының болуы және жүктілік, лактация кезеңдері вакцина қабылдауға қарсы көрсеткіштер болып табылады.
Сонымен бірге, вакцинаны келесі жағдайларда сақтықпен пайдалану керек:
1) жедел ауруы, созылмалы аурулардың өршуі және дене қызуы жоғары пациенттерге сақтықпен қолдану керек; қажет болған жағдайда, дәрігер вакцинацияны жүргізуді кейінге қалдырады;
2) қант диабетімен ауыратын пациенттерге және анамнезінде немесе отбасы анамнезінде құрысулар, эпилепсия, энцефалопатия, психикалық аурулары бар пациенттерге сақтықпен қолдану керек;
3) вакцинаны бұлшықетке енгізу кезінде пайда болуы мүмкін қан кету қаупіне байланысты қанның ұюының бұзылуы және тромбоцитопения бар пациенттерге сақтықпен қолдану керек;
4) қатерлі ісік, нефроздық синдром, ЖИТС-пен ауыратын науқастар (бұл кісілерге вакцина қалай әсер ететіні, қауіпсіздігі мен тиімділігі туралы деректер жоқ) сияқты иммундық функциясы бұзылған пациенттерде сақтықпен қолдану керек.
Егер вакцинадан кейін жүйке жүйесі тарапынан жағымсыз әсерлер пайда болса, өнімді қайта пайдалануға тыйым салынады.
