«Таза Қазақстан» экологиялық акциясының аясында Сауран ауданында қоршаған ортаны қорғауға және тарихи-мәдени нысандардың тазалығын сақтауға бағытталған жүйелі жұмыстар жүргізілуде. Соның бірі – «Киелі мекен» айдары шеңберінде ұйымдастырылған «Үкаша ата» кесенесінің аумағын абаттандыру және санитарлық тазалау шарасы.
Бұл іс-шара табиғатты қорғау мәдениетін қалыптастыруға, жастарды отансүйгіштік пен туған жерге деген жауапкершілікке тәрбиелеуге бағытталған. Киелі мекендердің тазалығы – тек экологиялық мәселе емес, ол – ұрпаққа қалдырылар тарихи және рухани мұраны сақтау міндеті.
Ауқымды тазалық жұмыстарына аудан әкімі Мақсат Таңғатаров арнайы қатысып, шараға белсенді араласты. Ол тұрғындармен бірге тазалық жұмыстарын жүргізіп, халықты табиғат пен тарихи нысандарды көздің қарашығындай қорғауға үндеді. Әкім өз сөзінде:
«Біз киелі мекендерді абаттандыру арқылы тарихымызды жаңғыртамыз, ұрпаққа үлгі көрсетеміз. Бұл – әр азаматтың парызы», – деп атап өтті.
«Үкаша ата» кесенесінің маңындағы тазалық жұмыстары барысында жалпы көлемі 90 гектар аумақ қамтылды. Қураған шөптер мен бейберекет өсіп кеткен ағаштар ретке келтірілді. Сонымен қатар, 100 метрге жуық бұлақ көзі аршылып, ауызсу алатын құдық маңы тұрмыстық қалдықтардан тазартылды. Бұл табиғи-тарихи аумақтың эстетикалық келбетін жақсартуға әрі экологиялық жағдайды тұрақтандыруға сеп болды.
Тазалық шарасына ауданға қарасты ауылдық округтерден келген 100-ге жуық ерікті тұрғын мен мемлекеттік қызметшілер қатысты. Олар арнайы құрал-жабдықтармен қамтамасыз етіліп, белгіленген учаскелерде бірлескен жұмыс жүргізді. Бұл аумақтың көріктенуіне үлес қосып қана қоймай, тұрғындар арасында экологиялық сана мен қоғамдық жауапкершілікті нығайтты.
Бүгінде Сауран ауданы бойынша 53 тарихи-мәдени ескерткіш тіркелген. Аталған нысандардың барлығы кезең-кезеңімен санитарлық тазалаудан өткізіліп, инфрақұрылымы жақсартылуда. Бұл бағытта аудан әкімдігі тарапынан кешенді жоспар жасақталып, жүйелі жұмыстар жалғасуда.
Жергілікті тұрғындардың белсенділігі мен мемлекеттік құрылымдардың үйлесімді жұмысының арқасында «Таза Қазақстан» акциясы нақты нәтижелер беруде. Игі бастамалар алдағы уақытта да жалғасын тауып, аудан аумағындағы өзге де тарихи орындарда тазалық және абаттандыру жұмыстары жалғасатын болады.
Аудан басшылығы барлық тұрғындарды қоршаған ортаны таза ұстауға, табиғи және тарихи мұраларды қадірлеуге, сондай-ақ мұндай қоғамдық шараларға белсенді қатысуға шақырады. Өйткені әрбір азаматтың экологиялық мәдениеті – елдің болашағына қосқан үлесі.
