Түркістан облысында халықаралық талаптарға сай атшабар мен ескек есу каналының құрылысы жалғасуда. Облыс әкімі Нұралхан Көшеров аталған нысандарды аралап, құрылыс барысымен танысты.
Көпфункционалды кешен ретінде салынып жатқан атшабар Халықаралық ат спорты федерациясының талабына сай бой көтеруде. Мұнда болашақта халықаралық жарыстарды өткізу көзделген. Атап айтқанда, Олимпиада ойындары бағдарламасына енгізілген конкур, үшсайыс және ұлттық спорт түрлері бойынша жарыстар өткізуге мүмкіндік тумақ.
Бұл нысанда 30-дан аса техника мен 71 адам жұмыс істеуде. Облыс әкімі нысанның құрылыс жоспарымен танысып, қолданылатын материалдары туралы мамандар пікірін тыңдап, жауапты басшылар мен мердігерге нақты міндеттер жүктеді.
Одан кейін Нұралхан Көшеров халықаралық деңгейдегі ескек есу каналының құрылыс барысын қалағалады. Ғимараттарын аралап, сапалы материал қолдану әрі сәулетін келісті ету жөнінде тапсырма берді.
Бұл кешен елімізде ескек есу, академиялық есу спорт түрлерін, сонымен бірге туризмді дамытуға мүмкіндік береді. Түркістан қаласының суару жүйесіне оң ықпалын тигізеді. Нысанның құрылысы 2021 жылы басталды. Үш кезеңнен тұрады. Бүгінгі таңда үшінші кезеңнің құрылыс жұмыстары қарқынды жүргізілуде. Құрылыс алаңында 165 адам және 24 техника жұмылдырылған.
Кешенде 1000 орындық трибуна, қайықтар мен спорттық жабдықтарды сақтауға арналған эллинг ғимараты, төрешілер мұнаралары, аэрация және сүзу жүйелері, инженерлік инфрақұрылым, сондай-ақ көрермендерге арналған табло, көгалдандыру және абаттандыру элементтері қарастырылған.
Жаңа спорт кешендерінің құрылысы аймақта спорттық туризмді де дамытуға серпін береді. Түркістан – тарихи және мәдени орталық ретінде халықаралық аренада танымал мекен. Спорт инфрақұрылымының дамуы қалаға шетелдік командалар мен спортшылардың жиі келуіне, оқу-жаттығу жиындарын өткізуіне қолайлы жағдай тудырады.
Сондай-ақ, облыста балалар мен жасөспірімдер спорт мектептерінің материалдық-техникалық базасын жаңғырту бойынша жұмыстар жалғасып жатыр. Жаңа кешендер арқылы дарынды балалар мен жас спортшылардың кәсіби деңгейде өсуіне, халықаралық жарыстарда ел намысын абыроймен қорғауына жол ашылады. Бұл өз кезегінде Қазақстан спортының дамуына қосылған үлес болмақ.
