Сенбілік жұмыстарына жұмылдырылған 4 арнайы техника – жүк көлігі, трактор, су шашатын көлік және тиегіш құралдар – жиналған қалдықтарды тиісті орындарға жеткізу жұмысын үйлесімді әрі тиімді орындады. Түркістан қаласының тазалығы мен көркіне бейжай қарамай, белсенділік танытқан 800-ге жуық қала тұрғыны сенбіліктің жоғары деңгейде өтуіне себепкер болды. Бұл – тұрғындардың қоршаған ортаға деген жауапкершілік пен жанашырлық көзқарасын білдіреді.
Қала әкімдігі тарапынан табиғатты қорғауға бағытталған бұл игі шаралардың маңыздылығы ерекше атап өтілуде. Түркістан қаласы әкімінің орынбасарлары, бөлім басшылары мен сектор жетекшілері тазалық жұмыстарын бақылап, мекемелердің үйлесімді жұмысын қамтамасыз етті. Олар өз кезегінде тұрғындарды экологиялық бастамаларға белсенді араласуға шақырды.
Айта кетейік, «Таза Қазақстан» акциясы еліміздің барлық аймақтарында жүзеге асып жатқан ірі экологиялық науқан болып табылады. Бұл бастама арқылы экологиялық мәдениетті арттырып қана қоймай, азаматтардың туған қаласына, қоршаған ортасына деген сүйіспеншілігін нығайту көзделуде.
Түркістан қаласы әкімдігі мұндай сенбіліктерді алдағы уақытта да тұрақты негізде өткізіп, қала аумағын абаттандыру және көгалдандыру жұмыстарын жүйелі түрде жүргізуді жоспарлап отыр. Сонымен қатар, экологиялық бастамалар аясында ағаш отырғызу, су арналары және арық жүйелерін тазалау, қалдықтарды сұрыптау мәдениетін дамыту сияқты бағыттарда да бірқатар жобалары іске асырылмақ.
Қоршаған ортаны таза ұстау — баршамыздың ортақ міндетіміз болып есептеледі. Осы ретте, Түркістан қаласы тұрғындары мен қонақтарын қаламыздың тазалығы мен көркіне бейжай қарамай, қоғамдық шараларға белсене қатысуға шақырамыз. Таза әрі жайлы Түркістан – бәріміздің ортақ үйіміз.
