Қазақстан Республикасы Президентінің кеңесшісі Мәлік Отарбаев жұмыс сапарымен Түркістан облысына келіп, өңір жұртшылығымен кездесті. Жиынға зиялы қауым мен ардагерлер кеңесінің өкілдері, дін қызметкерлері, аудан-қала әкімдері, Полиция департаментінің мамандары және белсенді жастар қатысты.
Кездесуде Мемлекет басшысы Қасым-Жомарт Кемелұлы Тоқаевтың Қазақстан халқына арнаған «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауы жан-жақты талқыланып, онда көрсетілген басым бағыттарды іске асыру тетіктері сөз болды.
Президент кеңесшісі Мәлік Отарбаев өз сөзінде Жолдауда белгіленген міндеттерді бүкіл қоғам болып жұмыла орындаудың маңыздылығын атап өтті. Оның айтуынша, цифрлық трансформацияны жеделдету, жасанды интеллектті енгізу, білім мен ғылымды дамыту, мемлекеттік басқаруды жетілдіру секілді стратегиялық міндеттерді жүзеге асыруға әрбір азамат атсалысуы қажет. Бұл бастамалар еліміздің жаһандық бәсекеге қабілеттілігін арттырып, әділетті және тиімді мемлекет құруға жол ашатыны жеткізілді.
Жиынды облыс әкімінің бірінші орынбасары Зұлпыхар Жолдасов жүргізіп, сапардың өңір жастары мен қоғам өкілдері үшін маңыздылығына тоқталды.
– Сіздің бұл сапарыңыз Жолдау бағыттарын терең түсінуге зор мүмкіндік береді. Онда еліміздің жаңа технологиялық даму кезеңіне арналған цифрлық трансформация, жасанды интеллектті енгізу, білім және ғылым әлеуетін арттыру, мемлекеттік басқару тиімділігін күшейту, ұлттық қауіпсіздікті қамтамасыз ету секілді маңызды міндеттер қамтылған. Бұл бастамаларды іске асыру – баршамыздың ортақ міндетіміз, – деді Зұлпыхар Жолдасов.
Басқосу барысында облыстық мәслихат төрағасы Нұралы Әбішов Жолдаудағы бастамалардың ел болашағы үшін стратегиялық мәні бар екенін атап өтті. Облыстық ардагерлер кеңесі төрағасының орынбасары Бақытжан Раманқұлов әлеуметтік даму бағытындағы міндеттерге тоқталып, аға буын әрдайым жастарға қолдау көрсетуге дайын екенін жеткізді.
Сондай-ақ Мемлекет басшысы Қасым-Жомарт Тоқаевтың қатысуымен өткен ауыл әкімдерінің диалог-платформасында берілген тапсырмалар аясында Созақ ауданы Жартытөбе ауылдық округінің әкімі Данияр Жүсіпов ауыл халқының тұрмыс сапасын арттыру бойынша атқарылып жатқан жұмыстар туралы баяндады.
Облыс жастары да Жолдауда белгіленген міндеттерді орындауға белсенді қатысып келеді. Осы бағыттағы мемлекеттік бағдарламалардың жүзеге асырылуы жөнінде Облыстық жастар ресурстық орталығының басшысы Ернар Бектаев есеп берді.
Жиын соңында қоғам өкілдері бірқатар маңызды ұсыныстарын ортаға салып, өңірдің әлеуметтік-экономикалық дамуына қатысты пікірлерімен бөлісті.
Түркістан облысы әкімінің баспасөз қызметі
