Түркістан қаласында «Назарбаев Зияткерлік мектептері» ДББҰ Педагогикалық шеберлік орталығының ұйымдастыруымен «Білім берудегі көшбасшы бағдары» тақырыбындағы өңірлік басқару интенсиві өтті. Іс-шараға Түркістан облысындағы орта білім беру ұйымдарының 800-ге жуық мектеп директоры қатысты.
Ашылу рәсімінде Түркістан облысы әкімінің орынбасары Ертай Алтаев, облыстық білім басқармасы басшысының міндетін атқарушы Ғалымжан Орынов және Педагогикалық шеберлік орталығының директоры Толқын Айдосова білім сапасына тұрақты қолдау көрсету, өзгерістерді тиімді басқару және мектеп басшылығындағы жаңа көзқарастың маңызын атап өтті.
Облыс әкімінің орынбасары Ертай Алтаев өз сөзінде Мемлекет басшысы Қасым-Жомарт Тоқаевтың педагог мәртебесі мен кәсібилігіне қатысты айтқан маңызды ұстанымдарын еске сала отырып:
«Облыста білім сапасын арттыру бағытында ауқымды жұмыстар жүргізілуде. Өткен жылы қолға алынған “Мектеп менеджменті: басқару аспектілері мен әдістері” курсы – осы маңызды миссияны жүзеге асырудағы елеулі қадам. 762 мектеп басшысы бұл курста тиімді басқарудың жаңа тәсілдерін меңгерді», – деді.
Интенсив барысында педагог-тренер Ескендір Бестай нәтижелі басшылықтың қырларын талдады. Түлкібас ауданындағы Н.Жандарбеков атындағы мектептің директоры Гүлжан Әмірбекова өз басқарушылық тәжірибесін ұсынса, Түркістан қаласындағы Назарбаев Зияткерлік мектебінің директоры Айдын Түсіпжанов тұрақты даму жолындағы бірлескен жұмыс пен ортақ құндылықтардың маңызын атап өтті.
Бағдарламада стратегиялық жоспарлау, кадрлық менеджмент, кәсіби мәдениет, шешім қабылдау, цифрлық басқару, тиімді серіктестік, ресурстарды тиімді пайдалану, қауіпсіз ортаны қалыптастыру және жоба менеджменті сияқты негізгі бағыттар қамтылды. Шеберлік сағаттары мен кейс-сессияларда мектеп директорлары тәжірибе алмасып, басқарудағы тиімді тәсілдерді талқылады.
«Білім берудегі көшбасшы бағдары» жобасы Педагогикалық шеберлік орталығының мектеп басшыларының кадр резервін дамытуға және олардың кәсіби біліктілігін арттыруға бағытталған жүйелі жұмысының жалғасы болып табылады. 2023 жылдан бастап Орталық «Білім берудегі өзгерістердің 1000 көшбасшысы» мемлекеттік бағдарламасы аясында жаңа буын білім беру көшбасшыларын даярлап келеді.
