Түлкібас ауданының түлектері мұқтаж отбасыға аудан орталығынан баспана сыйлады. Абай атындағы білім ордасы мен Б.Садықов және М.Ломоносов атындағы мектептерін 20 жыл бұрын тәмамдаған түлектер 13 млн теңгеге жуық қаражат жинап, соның 9 млн теңгесіне үй сатып алған. Кейін баспананы толық жөндеуден өткізіп, ішін қажетті жиһаз-техникалармен жабдықтап беріп отыр.
Қасиетті жұма күні сауапты істі ұран қылған түлкібастықтар үйдің ауласында 300 адамға ас беріп, Қаратаевтар отбасына үйдің кілтін табыстады. Жас отбасының отағасы 1-топ мүгедектігі бар азамат. Осы кезге дейін отбасымен жалдамалы пәтерде тұрып келген.
Игі шарада аудан әкімінің орынбасары Е.Орманов, аудандық ардагерлер кеңесінің төрағасы Қ.Анашев, ардагер ұстаздар мен аталған білім ордаларын бітірген түлектер сөз сөйлеп, баспаналы болған жас отбасыға ыстық лебіздерін білдірді. Шара соңында дәстүр бойынша 2005 жылғы мектеп түлектері эстафетаны 2006 жылғы түлектерге табыстады. Айта кетейік, дәл осындай игі шара аудан орталығынан бөлек, Түлкібас кентінде де жалғасын таппақ. Ол жерде де мектеп бітіргендеріне 20 жыл болған түлектер 2 мұқтаж отбасыға баспана сыйлағалы отыр. Игі дәстүрге арналған бұл бастама 8 жылдан бері жалғасын тауып келеді.
Түркістан облысының Өңірлік коммуникациялар қызметі
