Бұл туралы Орталық коммуникациялар қызметінде өткен баспасөз мәслихатында Түркістан облысының әкімі Нұралхан Көшеров мәлімдеді.
Әкімнің айтуынша, өңірдің географиялық және климаттық ерекшелігін ескере отырып, үш кластерлік бағыт – мақта, ет және жүгері кластерін дамыту қолға алынған.
Мақта-тоқыма кластері су үнемдеу технологияларын қолдана отырып, элиталық сорттағы мақтаны өсіру және шикізатты терең өңдеуді қамтамасыз етеді. Кластер өндірістік процестің барлық кезеңін қамтиды: мақта өсіруден бастап, жіп, мата сияқты дайын тоқыма өнімдерін шығару. Мақта кластерінде 5 жобаны іске асыру нәтижесінде 7 мыңнан астам адам жұмыспен қамтылып, 201 млрд теңге инвестиция тартылуы жоспарлануда. Мақта өнімділігі 2–3 есеге артатын болады, жылына 229 мың тонна мақта өндіріледі. Биыл пилот ретінде Отырар ауданында 32 мың гектар алқапқа жаңа әдіспен мақта егілді, түсім жоғары болды. Сонымен қатар 2 мақта өңдеу зауыты іске қосылып, жіп иіру фабрикасының құрылысы аяқталу сатысында тұр.
Жүгері кластері аясында Шардара ауданында «Казкрахмал» зауыты салынып жатыр. Жоба құны – 35 млрд теңге, 251 жұмыс орны ашылады. Жылына 150 мың тонна жүгері терең өңделіп, 26 түрлі өнім шығарылады. Кластердің іске асырылуы жүгері егістігін 2030 жылға қарай 40 мың гектардан 70 мың гектарға жеткізуге мүмкіндік береді.
Ет кластері бойынша 7 жоба жүзеге асырылуда. Жалпы құны – 50 млрд теңге, қуаттылығы – 35 мың тонна, ашылатын жұмыс орны – 802. Орталық Азияда теңдесі жоқ 50 мың бас ірі қара мал бордақылау және ет өнімдерін терең қайта өңдейтін кешендер, заманауи мал биржасы салынып жатыр. Қазіргі уақытта «Kaz Eco Meat», «Turkestan Agro.kz» және «Бес Қара» ет өңдеу кешендері іске қосылды. Бұл қосымша 35 мың тонна ет өңдеуге мүмкіндік береді.
Сонымен қатар, Түлкібас ауданында «Қарқын Трейд» компаниясы ет бағытында ірі құс фабрикасының құрылысын бастады. Жоба құны – 53 млрд теңге, жылына 48 мың тонна құс еті өндіріледі.
Бұл кластерлік бағыттар отандық терең қайта өңдеуді дамытуға, шаруалардың өнімін нарыққа кепілді түрде жеткізуге және облыс экономикасының өсуін қамтамасыз етуге бағытталған.
