Бұл туралы Орталық коммуникациялар қызметінде өткен баспасөз мәслихатында Түркістан облысының әкімі Нұралхан Көшеров мәлімдеді.
Әкімнің айтуынша, агроөнеркәсіптік кешен саласында 2025–2027 жылдарға арналған инвестициялық жобаларды іске асырудың Жол картасы бекітілген. Жол карта шеңберінде жалпы құны 295,5 млрд теңге болатын 78 инвестициялық жобаны жүзеге асыру жоспарланып отыр. Биыл олардың қатарынан 31 жобаны іске асыру көзделген. Бүгінгі күнге дейін 60,8 млрд теңгеге 27 жоба жүзеге асырылып, 1 030 жаңа жұмыс орны құрылған.
Көшеровтың айтуынша, Түркістан – ауыл шаруашылығын дамытуға ең қолайлы өңірлердің бірі. Өңірде шикізатты ғана емес, ауыл шаруашылығы өнімдерін терең өңдеуді дамытуға басымдық беріліп, заманауи технологиялар енгізілуде. Осы жұмыстардың нәтижесінде агроөнеркәсіп кешенінде тұрақты экономикалық өсімге қол жеткізілді. Биылғы 10 айда ауыл шаруашылығының негізгі капиталына 155,6 млрд теңге инвестиция салынып, көрсеткіш 1,1 есеге артты. Ал тамақ өндірісі саласына 31,5 млрд теңге инвестиция тартылып, өсім 1,3 есені құрады.
Өңірдің экспорттық көрсеткіштері де жақсарып келеді. Ауыл шаруашылығы өнімдерінің экспорты 355,5 млн АҚШ долларына жетіп, 1,1 есеге артты. Жалпы ауыл шаруашылығы өнім көлемі 182,5 млрд теңгеге өсіп, 1 трлн 86,9 млрд теңгеден асты. Бұл көрсеткіш бойынша Түркістан облысы республикада бірінші орында тұр.
Биыл облыста ауыл шаруашылығы дақылдары 907 мың гектарға егіліп, өткен жылмен салыстырғанда 34 мың гектарға артты. Дала жұмыстарына қажетті жанар-жағармай, минералды тыңайтқыштар, тұқым және кредиттік ресурстар толық әрі уақтылы қамтамасыз етілді. Нәтижесінде:
-
695 мың тонна дәнді дақыл,
-
54 мың тонна майлы дақыл,
-
1,5 млн тонна көкөніс пен картоп,
-
1,7 млн тонна бақша өнімі,
-
5 млн тонна малазықтық дақыл,
-
428 мың тонна мақта
жиналды.
Өңірде өнеркәсіптік жылыжайларды дамыту жұмыстары қарқын алған. Биыл жылыжайлар көлемі 75 гектарға ұлғайып, жалпы алаңы 1 715 гектарға жетті. Республикадағы жылыжай қорының 76 пайызы Түркістан облысының үлесінде. Жылыжайлардың алғашқы айналымында 102 мың тонна көкөніс жиналды. Келесі жылы көлемді тағы 62 гектарға кеңейтіп, облыстың республикадағы үлесін 80 пайызға жеткізу жоспарлануда.
Келес ауданында 500 гектар аумақта «Еcoculture Eurasia» ірі жылыжай кешені салынып жатыр. Жоба жыл бойы 240 мың тоннадан астам көкөніс өндіруге мүмкіндік береді және 7 мың жұмыс орнын құруға жол ашады. Биыл кешеннің бірінші кезеңін іске қосу жоспарланған.
