Түркістан облысының әкімі Нұралхан Көшеров Орталық коммуникациялар қызметінде өткен баспасөз мәслихатында өңірдегі су үнемдеу шаралары туралы баяндады.
– Мемлекет басшысының су үнемдейтін озық технологияларды жедел енгізу жөніндегі тапсырмасына сәйкес облыста кешенді жұмыстар жүзеге асырылуда. Су үнемдеу жүйелерін қолдану ағын суды екі есеге дейін үнемдеп, ауыл шаруашылығы дақылдарының өнімділігін үш есеге дейін арттыруға мүмкіндік береді. Түркістан облысы еліміздегі суармалы жерлердің төрттен біріне ие. Суармалы алқаптардың жалпы көлемі 554 мың гектарды құрайды. Биыл 27 мың гектарға су үнемдеу технологиялары енгізілу жоспарланып, 59 мың гектарға орнатылды. Жоспар артығымен орындалды. Нәтижесінде су үнемдеу технологиялары енгізілген жалпы жер көлемі 114 мың гектарға жетті, – деді әкім.
Суару технологияларының қолжетімділігін арттыру мақсатында өңірде алты кәсіпорын ашу қолға алынған. Оның төртеуі іске қосылды, алдағы уақытта тағы екі кәсіпорын жұмыс істей бастайды. Бұл кәсіпорындар іске қосылғанда 364 мың гектарға су үнемдеу технологиялары қамтамасыз етіледі және облыс пен көршілес өңірлер толық қамтылады.
Отырар ауданында су үнемдеу технологияларын қолдану арқылы күріш өсіру жобасы жүзеге асырылды. Жоба құны 7 млн АҚШ доллары, тамшылатып суару әдісі нәтижесінде өнімділік артты, су көлемі екі есеге үнемделді.
Облыс аумағында ағын суды жеткізетін ұзындығы 12 731 шақырымды құрайтын 4 180 канал бар. Қазіргі кезде каналдардың 76%-ының тозығы жеткен. Бұл мәселені шешу үшін кешенді жоспар қабылданып, Ислам даму банкінің қаржысы есебінен 302 су нысанын жөндеу көзделген. Жұмыстар аяқталған соң каналдардың тозу деңгейі 50%-ға дейін төмендейді.
Сонымен қатар, облыста жалпы сыйымдылығы 121 млн текше метр болатын төрт су қоймасын салу жоспарлануда. «Бәйдібек ата» және «Қарақуыс» су қоймаларының құрылысы жүргізілуде, ал «Боралдай» және «Иқан су» қоймаларының жобалары әзірленуде. «Бәйдібек ата» және «Боралдай» су қоймалары іске қосылғанда Түркістан қаласы мен бес аудан тұрақты түрде 113 млн текше метр сумен қамтамасыз етіледі. Сонымен қатар, 16 мың гектарға жуық жердің су қамтамасыз етілуі жақсарып, ауыл шаруашылығы өнімдерінің көлемін жылына 200 млрд теңгеге дейін арттыруға мүмкіндік туады.
Аталған шаралар су ресурстарын тиімді басқаруға, ауыл шаруашылығының өнімділігін арттыруға және өңірдің су қауіпсіздігін қамтамасыз етуге бағытталған.
