Бұл туралы Орталық коммуникациялар қызметінде өткен баспасөз мәслихатында Түркістан облысының әкімі Нұралхан Көшеров мәлімдеді.
Әкімнің айтуынша, облыста қолайлы инвестициялық климат қалыптасып, сыртқы экономикалық байланыс айтарлықтай нығайған. Инвесторлар үшін арнайы экономикалық және индустриалды аймақтарда дайын өндірістік алаңдар қарастырылып, мемлекет тарапынан қажетті инфрақұрылым тартылуда. Сонымен қатар түрлі салықтық жеңілдіктер ұсынылады.
Инвестициялық әлеуетті арттыру мақсатында жалпы құны 2,6 трлн теңгені құрайтын 111 инвестициялық жоба пулы әзірленді. Басым бағыттар ретінде энергетика саласы және ауыл шаруашылығы өнімдерін терең өңдеу айқындалды. Бұл жобаларды жүзеге асыру арқылы шамамен 24 мың жаңа жұмыс орны ашылып, бюджетке 100 млрд теңгеден астам қосымша салық түсуі күтіледі.
Биыл жалпы құны 340 млрд теңге болатын 58 жобаны іске асырып, 8 220 жұмыс орнын құру жоспарланған. Оның ішінде 10 ай ішінде 41 жоба іске қосылып, 5 322 адам жұмыспен қамтылды.
Атқарылған жұмыстардың нәтижесінде биылғы 10 айда өңір экономикасына 1,2 трлн теңге инвестиция тартылып, өсім деңгейі 124,2 пайызды құрады. Шетелдік инвесторлармен келіссөздер тұрақты түрде жүргізіліп, жаңа өндірістік жобалар қолға алынуда.
