Өткен жылы «Ауыл аманаты» бағдарламасының қолдауымен Түлкібас ауданына қарасты Майтөбе ауылында ашылған «Майтөбе сүт» ауыл шаруашылығы өндірістік кооперативі осы кезге дейін тәулігіне 1 тонна сүтті өңдеп, түрлі өнім шығарып келген-ді.
Бүгінде халықтың көңілінен шыққан, сапалы әрі дәмді өнімдері сұранысқа ие цех енді өнім көлемін 3 есеге арттырып, тәулігіне 3 тонна сүт өңдемек. Бүгін аталған нысанға аудан әкімі Асқар Естібаев, аудандық мәслихаттың төрағасы Серғали Сәрсенбаев және жауапты мамандар арнайы барып, кәсіпкердің жаңа жобасымен танысты. Жоба аясында заманауи технологиялармен жабдықталған өндірістік желілер іске қосылып, жаңа құрал-жабдықтар сатып алынған. «Майтөбе сүт» өндірістік кооперативінде айран, қаймақ, сары май, сүзбе, чечель, ірімшік, құрт сияқты халық арасында кең қолданысқа ие сүт өнімдері өндіріліп, дүкен сөрелеріне сатылымға шығуда. Қолөнер тәсілімен дайындалатын табиғи өнімдердің дәмі ғана емес, сапасы да жоғары бағалануда. Тұтынушылар бұл өнімдерді экологиялық тазалығы мен құрамының табиғилығы үшін таңдайды. Кооператив өнімдері қазіргі таңда тек Түлкібас ауданына ғана емес, Түркістан облысының өзге аудандарына да жөнелтілуде. Жақын болашақта Алматы мен Шымкент қалаларына жеткізу жұмыстары жолға қойылмақ. Осы арқылы өндірістік кооператив тек жергілікті емес, аймақтық деңгейдегі кәсіпорынға айналуы мүмкін. Бүгінгі таңда кәсіпорында екі ауысыммен 18 адам жұмыс істеуде. Олардың басым бөлігі – Майтөбе ауылының тұрғындары. Бұл ауыл халқы үшін маңызды әлеуметтік мүмкіндікке айналды. Тұрақты жалақы, әлеуметтік кепілдік, кәсіби даму сынды артықшылықтар ауыл жастары мен әйелдеріне үлкен қолдау болып отыр.
Жаңа желілер іске қосылған соң, жұмыс күші тағы 10-15 адамға артпақ. Сонымен қатар, кооператив сүтті жергілікті тұрғындардан қабылдап, оларға да тұрақты табыс көзі болуда. Бұл ауылдық жердегі ішкі экономикалық айналымды жандандырып, халықтың тұрмыс деңгейін көтеруге сеп болуда. Аталмыш өндірістік кооперативті қайта жабдықтау жұмыстарына 80 млн теңге жұмсалған. Бұл қаржыға өндірістік жабдықтар, сүт сақтау және өңдеу цистерналары, қаптау және буып-түю желісі сатып алынды. Сонымен қатар, өнімнің жарамдылық мерзімін ұзарту және сақтау технологиясы да жетілдірілді. Кооператив басшысы Бауыржан Ахметовтің айтуынша, инвестиция нәтижесінде өнім ассортиментін көбейтуге де мүмкіндік туып отыр. Алдағы уақытта йогурт, сүтті коктейль, балқаймақ секілді жаңа өнім түрлерін өндіру жоспарда бар. Бұл – кооперативтің нарықтағы бәсекеге қабілеттілігін арттырып, тұтынушылар қатарының көбеюіне ықпал етпек. «Ауыл аманаты» бағдарламасы аясында жүзеге асқан бұл жоба – ауылдық кәсіпкерлік пен ауыл шаруашылығын дамытуда мемлекеттің қолдауы қаншалықты маңызды екенін көрсетеді. Бағдарлама шеңберінде жеңілдетілген несие, инфрақұрылымдық қолдау, өндірістік оқыту және бизнес жүргізуге бағытталған кеңестер сынды кешенді көмек түрлері қарастырылған.Аудан басшылығы кооперативтің қызметіне оң бағасын беріп, өз тарапынан қолдаудың жалғасатынын жеткізді. Сонымен қатар, өзге де ауылдық кәсіпкерлерге осындай жобалардан үлгі алып, белсенділік танытуға шақырды. «Майтөбе сүт» өндірістік кооперативінің жетістігі – ауылдағы шағын кәсіптің де үлкен нәтижеге қол жеткізе алатынын айқын дәлелдейді. Қарапайым бастама, мемлекеттік қолдау және іскерліктің үйлесімі арқылы Майтөбе ауылында өңірге белгілі сүт өңдеу орталығы құрылды. Бұл – ауыл тұрғындары үшін де, аудан экономикасы үшін де үлкен жетістік. Алдағы уақытта кооператив өндірісті кеңейтіп, жаңа нарықтарға шығуды жоспарлап отыр. Мұның барлығы – ауыл шаруашылығы саласының әлеуетін тиімді пайдалану және халықтың игілігі үшін еңбек ету жолындағы табанды қадамдар.
