2025 жылғы 23 мамырда №1 М.Әуезов атындағы жалпы білім беретін мектепте мектеп бітіруші түлектер үшін соңғы қоңырау соғылды. Бұл күн – он бір жылдық білім жолының мәресіне жеткен, шәкірттердің үлкен өмірге қадам басар сәті.
Салтанатты шараға аудан әкімі аппаратының басшысы Бауыржан Шомпиев, аудандық білім бөлімінің әдіскері Гаухар Шамеева, мектеп директоры Гүлжан Ғаниева және ата-аналар, ұстаздар мен оқушылар қатысты.
«Сыңғырла, соңғы қоңырау!» атты мерекелік кештің шымылдығын ашқан мектеп директоры Гүлжан Ғаниева түлектерге жүрекжарды тілегін білдіріп:
«Қоңырау – шәкірт жүрегінде мәңгі сақталатын үн. Бұл қоңырау сіздердің жаңа өмірге бастар сапарларыңыздың нышаны болсын. Сәттілік серіктеріңіз болсын!» – деді.
Аудан әкімі аппаратының басшысы Бауыржан Шомпиев:
«ҚР Президенті Қасым-Жомарт Тоқаев жастар тәрбиесі мен білім саласына айрықша көңіл бөліп отыр. Сіздер – еліміздің болашағысыздар. Терең білім алып, үлкен жетістіктерге жетулеріңізге тілектеспін» – деп, түлектерге сәт сапар тіледі.
Сондай-ақ, Гаухар Шамеева мектеп мұғалімдеріне құрмет көрсетіп, алғыс хаттар табыстады.
Мерекелік кеш түлектер мен ұстаздардың, ата-аналардың естелік суретке түсуімен қорытындыланды.
Шардара ауданы әкімінің баспасөз қызметі
