Шардара ауданы ішкі саясат бөліміне қарасты Жастар ресурстық орталығы КММ-ның ұйымдастыруымен жастар арасында лудоманияның (ойынқұмарлықтың) алдын алуға бағытталған «Ой-дода» атты интеллектуалды сайыс өткізілді.
Іс-шараның басты мақсаты – жастар арасында салауатты өмір салтын насихаттау, зиянды ойындардың зардабына назар аударту және ойлау қабілетін дамыту болды. Интеллектуалды сайыс ойын формасында ұйымдастырылып, жастардың білім деңгейі мен тапқырлығын анықтауға бағытталды.
Сайысқа бірнеше команда қатысып, әртүрлі тақырыптар бойынша білімдерін ортаға салды. Қатысушылар өздерінің эрудициясы, жылдам ойлау қабілеті және логикалық ойлау машықтары арқылы ерекшеленді. Тартысты өткен дода нәтижесінде жеңімпаздар анықталды:
🏆 1 орын – Neon zheke
🥈 2 орын – Жалындаған жастар
🥉 3 орын – Erkin live
Сайыс қорытындысы бойынша барлық қатысушыларға арнайы дипломдар, алғыс хаттар және бағалы сыйлықтар табысталды.
Шара соңында ұйымдастырушылар жастарға құмар ойындардың зияны, тәуелділік белгілері және оның алдын алу жолдары туралы ақпараттық жадынама ұсынып, белсенділік танытқан қатысушыларға алғыс білдірді.
«Жастардың осындай форматтағы білім сайыстарына қызығушылық танытуы – олардың интеллектуалды дамуымен қатар, зиянды әдеттерден бойын аулақ ұстауға бағытталған оң қадам. Бұл – біздің болашағымызға салынған берік негіз», – деп атап өтті Жастар ресурстық орталығының өкілдері.
Жастардың белсенділігі мен ынтасы – ел болашағының жарқын кепілі. Мұндай іс-шаралар алдағы уақытта да өз жалғасын табатын болады.
Шардара ауданы ішкі саясат бөлімі
Жастар ресурстық орталығы КММ
