Сауран ауданы Ескі Иқан ауылындағы Мәдениет үйінде Түркістан облысы әкімдігі мен “AMANAT” партиясы және «Айтыс ақындары мен жыршы-термешілердің халықаралық одағының» қолдауымен «Жібек жолының жауһары» атты аймақтық ақындар айтысы өтті. Жыр додасы — Мемлекет басшысы Қасым-Жомарт Тоқаевтың 2025 жылды «Жұмысшы мамандықтар жылы» деп жариялауына орай және Ұлы Жеңістің 80 жылдығына, Қазақстан Халқы Ассамблеясының 30 жылдығы мен Абай Құнанбайұлының 180 жылдық мерейтойына арналды.
Айтысты аудан әкімінің кеңесшісі Мұхамеджан Ергешбайұлы ашып беріп, ақындарға сәттілік тіледі. Ақындар алдын ала белгіленген тақырыптар бойынша жұппен өнер көрсетті. І жұпта Бекарыс Шойбеков пен Сырым Әуесхан «Біз достықтың мекеніміз» тақырыбын жырлады. ІІ жұпта Шұғайып Сезімхан мен Нұрзат Қару «Отбасы бақыты – шаңырақ шаттығы» тақырыбында айтысты. ІІІ жұпта Аян Ниязбек пен Ахметрасул Баянбай «Ауылым алтын бесігім» тақырыбын көтерді. Ал ІV жұпта Қажымұхан Абзалов пен Нұрмахан Жақыпбек «Жеңістің жаққан алауын» тақырыбында сөз сайыстырды. V жұптағы Мейіржан Жақып пен Нұрдәулет Өмірбек «Абай жолы – өмір жолы» тақырыбында өнер көрсетті. VI жұпта Еркебұлан Қайназаров пен Қалижан Білдашев «Еңбек адамы – ел мақтанышы» тақырыбын арқау етіп, көрерменге мазмұнды айтыс ұсынды.
Аламан доданың қазылар алқасына танымал айтыс жанашыры Оразымбет Бөрібай төрағалық етті. Қазылар алқасы әділ шешім қабылдап, әр ақынның шеберлігіне, тапқырлығына және тақырыпты ашудағы өнеріне лайықты баға берді. Қазылар шешімімен бас жүлде – Бекарыс Шойбековке (1 000 000 теңге), І орын – Еркебұлан Қайназаровқа (600 000 теңге), ІІ орын – Нұрзат Қаруға (450 000 теңге), ІІІ орын – Қажымұхан Абзалов, Қалижан Білдашев, Шұғайып Сезімхан, Сырым Әуезханға (350 000 теңгеден) бұйырды. Сондай-ақ, арнайы жүлделер иегерлері 250 000 теңге көлемінде сыйақы берілді. “Тәушен Абуова” атындағы жүлде – Аян Ниязбекке, “Әселхан Қалыбекова” атындағы жүлде – Мейіржан Жақыпқа, “Қаныбек Сарыбаев” атындағы жүлде – Нұрмахан Жақыпбекке, Түркістан облысы Мәдениет басқармасының жүлдесі – Ахметрасул Баянбайға, Сауран ауданы әкімінің арнайы жүлдесі – Нұрдаулет Өмірбекке табысталды.
Түркістан облысының Өңірлік коммуникациялар қызметі
