Түркістан облысына қарасты Сарыағаш ауданында ауыл шаруашылығы саласы қарқынды дамып келеді. Аудан диқандары биылғы егіс науқанын табысты аяқтап, алғашқы өнімдерін жинауға кірісті. Атап айтқанда, ерте пісетін картоп дақылының алғашқы алқаптарында өнім жинау жұмыстары басталды.
Аудан бойынша биыл 2,1 мың гектар жерге ерте пісетін картоп егілген, бүгінде шаруалар егін жинауға белсене кірісіп отыр. Бұл көктемгі өнім халықтың азық-түлік қауіпсіздігін қамтамасыз етуге және нарықты ерте өніммен қамтуға үлкен септігін тигізеді.
Ерте өнім беретін картоп алқаптары негізінен ауданға қарасты Қабланбек, Құркелес, Жартытөбе және Тегісшіл ауылдық округтерінде орналасқан. Бұл елдімекендерде көкөніс және картоп шаруашылығымен айналысатын ондаған шаруа қожалықтары бар. Олар озық агротехникалық тәсілдерді пайдаланып, өнімділікті арттыруға күш салып келеді. Жиналған картоп Түркістан облысының ішкі нарығымен қатар, басқа аймақтарға да жөнелтілуде.
Сарыағаштық шаруалардың айтуынша, картоптың ерте пісетін сұрыптары ауа райына бейімделген, әрі қысқа мерзімде өнім беруге қабілетті. Бұл өз кезегінде жылына екі рет өнім алуға мүмкіндік береді. Ал өнім көлемі мен сапасы фермерлердің табысын еселеп, жергілікті халықты тұрақты жұмыспен қамтып отыр.
Жалпы, биыл Сарыағаш ауданында 75,7 мың гектар егістік жерге ауыл шаруашылығы дақылдары егілді. Оның ішінде:
-
51,1 мың гектар жерге дәнді және майлы дақылдар егілген. Атап айтқанда:
-
бидай – 40,5 мың га
-
жүгері – 1,5 мың га
-
арпа – 7,9 мың га
-
күнбағыс – 224 га
-
мақсары – 910 га
-
-
479 гектар – бақша өнімдері
-
2,1 мың гектар – картоп
-
10,6 мың гектар – көкөніс дақылдары
-
11,5 мың гектарға мал азығы егілген
Бұл көрсеткіштер Сарыағаш ауданындағы егіншілік бағытындағы тұрақты дамудың айғағы. Аудан диқандары маусымдық жұмыстарды уақытылы бастап, барлық агротехникалық шараларды толық орындауда. Нәтижесінде, өнім көлемі мен сапасы артты, ал ауыл тұрғындары үшін табыс көзі де кеңейіп отыр.
Биылғы егін науқаны өңірдің әлеуметтік-экономикалық жағдайына оң әсер етпек. Егіннен түскен табыс ауыл шаруашылығының одан әрі дамуына серпін беріп, азық-түлік қауіпсіздігін нығайта түседі.
Айта кетейік, Түркістан облысы бойынша ауыл шаруашылығы саласы басым бағыттардың бірі ретінде қарастырылып келеді. Соңғы жылдары салада тың жобалар жүзеге асып, жаңғырту жұмыстары жүргізілуде. Заманауи технологиялар мен мемлекеттік қолдаудың арқасында шаруалар жоғары өнім алып, жергілікті нарықты тұрақты түрде сапалы өніммен қамтып отыр.
