Мемлекет басшысы Қасым-Жомарт Тоқаевтың «Әділетті мемлекет. Біртұтас ұлт. Берекелі қоғам» атты Жолдауында: «Еліміздің экономикасы сыртқы саудаға және инвестицияға әрдайым ашық. Инвестиция тарту жұмысын жүйелі жүргізу керек. Бұл –Үкіметтің алдында тұрған басты міндеттің бірі» деп атап өткен болатын. Осы мақсатта Сарыағаш ауданында ауқымды жобалар қолға алынбақ.
Жуырда өңір басшысы Арман Абдуллаев ауданға инвестиция тарту мақсатында «Аль-баракад» ЖШС-ң өкілдерімен кездесіп, Дарбаза ауылдық округінде салынып жатқан индустриалды аумақтан күнбағыс майын шығаратын зауыт ашу жобасымен танысты. Күнбағыс майын шығаратын зауыттың қуаттылығы тәулігіне 45 тонна. Жоба құны — 500 млн теңге. Зауытты биылғы жылдың соңына дейін іске қосып, күнбағыс өсімдігінен май және құнарлы мал азығын шығару жоспарлануда.
Айта кетсек, ауданға инвесторлар тартылып, жаңа нысандардың ашылуы — аудан бюджетінің ұлғаюына алып келеді. Сонымен қатар, ашылған нысандарда жергілікті тұрғындар жұмыспен қамтылып, жұмыссыздық мәселесін шешуге де өз септігін тигізеді.
Түркістан облысының Өңірлік коммуникациялар қызметі
