Мемлекет басшысы Қасым-Жомарт Тоқаевтың 2025 жылғы 8 қыркүйектегі «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауында жол қауіпсіздігі мәселесі ерекше атап өтілді. Президент қоғамда көлік апаттарының жиілеуі өзекті проблемаға айналып отырғанын айтып, құқық қорғау органдарының жұмысына жаңа талаптар қойып, азаматтарды жолдағы жауапкершілікті күшейтуге шақырды.
Осы тапсырмалардың орындалуын қамтамасыз ету және Қазығұрт ауданы аумағындағы жол-көлік оқиғаларының алдын алу мақсатында Түркістан облысы прокурорының аға көмекшісі, топ басшысы Тұрсынбаев Ербол Асқарбекұлы бастаған арнайы жұмысшы топ ауданға келіп, кеңейтілген кездесу өткізді.
Жиынға аудан әкімінің аппаратының қызметкерлері, құқық қорғау органдарының өкілдері, аумақтық мекемелер мен дербес бөлімдердің басшылары, ауыл округтерінің әкімдері және бұқаралық ақпарат құралдарының өкілдері қатысты.
Кездесу барысында аудан аумағындағы жол-көлік оқиғаларының қазіргі жағдайы жан-жақты талқыланып, олардың санын азайтуға бағытталған нақты ұсыныстар қаралды. Сонымен қатар аудандық полиция бөлімінің бастығының міндетін атқарушы Бексұлтан Бекжанұлы, аудан прокуратурасының прокуроры Еркебұлан Нұрланұлы, аудандық «Тұрғын үй-коммуналдық шаруашылық, жолаушылар көлігі және автомобиль жолдары» бөлімінің басшысы Тұрдалы Қуанышбайұлы өз салалары бойынша атқарылып жатқан жұмыстар туралы баяндама жасап, проблемалық мәселелерге тоқталды.
Баяндамашылар жүргізушілер мәдениетін арттыру, жол қозғалысы ережелерінің сақталуын қамтамасыз ету, жол инфрақұрылымын жақсарту, көше бойына қажетті жол белгілерін орнату, жаяу жүргіншілер үшін қауіпсіз жағдай қалыптастыру, сондай-ақ жылдамдықты бақылауға арналған бейнебақылау камераларының санын арттырудың маңыздылығын атап өтті.
Кездесу қорытындысында Түркістан облысы прокурорының аға көмекшісі, топ басшысы Тұрсынбаев Ербол Асқарбекұлы жауапты органдарға жол-көлік оқиғаларының алдын алу және азайту бағытындағы жұмыстарды жүйелі түрде күшейтуді, қауіпсіздік талаптарының сақталуын қатаң бақылауға алуды, инфрақұрылымдық жетіспеушіліктерді жою бойынша нақты шаралар қабылдауды тапсырды.
