Бүгін түркістандықтардың алғашқы легі PFIZER вакцинасын қабылдады. Елімізде алтыншы болып тіркелген бұл екпе түрі бірінші кезекте жүкті әйелдер мен 12-17 жастағы жасөспірімдерге өз еріктерімен салынуда. Халықтың вакцина салуға ынтасы қандай? Тілші бейнематериалы.
Диас Тоқтамыс – қаладағы Нұртас Оңдасынов атындағы «Дарын» мектеп-интернатының 10 сынып оқушысы. PFIZER вакцинасы аймаққа жеткенін ести сала, осында келіпті. Аталған екпені алуына — оның организмге қауіпсіздігі, сонымен қатар шет елдерге емін-еркін кіріп-шығуға мүмкіндік беретіні себеп болған. Өйткені, жасөспірім болашақта шет елде білім алуға ниетті.
Диас Тоқтамыс, оқушы:
«Мен бүгін PFIZER вакцинасын алуға келісім бердім. Және ата-анам да қарсы болған жоқ. PFIZER вакцинасын салғаным өзімнің және жақындарымның денсаулығы үшін. Дәл қазір өзімді жақсы сезініп тұрмын. Және барлығыңызды вакцина салдыруға шақырамын».
Ал Нұргүл Сайлауова бүгінде жүктіліктің 34 аптасында. Ол екпені өзінің және болашақ перзентінің денсаулығының кепілі деп санайды. Сондықтан вакцинаны алғашқылардың бірі болып салдырды.
Нұргүл Сайлауова, болашақ ана:
«Бүгін маған вакцина салу бақыты бұйырып отыр екен. Жүктіліктің 34 аптасындамын. Вакцинаны салдыру ойымда көптен бері жүрген еді. Балам үшін және өзімнің денсаулығым үшін. Қазір өзімді жақсы сезініп тұрмын. Ешқандай ауырсыну жоқ. Көңіл-күйім де жақсы».
Емхана басшысының орынбасары Динара Бердіқұлованың айтуынша, Түркістан қалалық емханасына PFIZER вакцинасының 11,148 дозасы бөлінген. Бүгін оның 240 дозасын егу жоспарланған. Түске дейін екпе алғандардың саны 50-ге жеткеніне қарап, халықтың вакцинаға деген көзқарасы жақсы екендігін аңғаруға болады.
Динара Бердіқұлова, қалалық емхана бас дәрігерінің орынбасары:
«Дәл қазір 50-ге жуық адам өз еркімен келіп вакцина алып отыр. Соның ішінде 22 жүкті әйел, 24 мектеп оқушысы мен босанғанна кейінгі 40 күн өткен бала емізетін әйелдер бар. Барлығының жағдайы бірқалыпты. Олар үш күндік медициналық бақылауға алынды».
Мамандардың айтуынша, PFIZER вакцинасының басқа екпелерден ерекшелігі – ешқандай кері әсер бермеуінде. Себебі оның құрамында ешқандай вирустық құрам жоқ.
