Шардара ауданының 60 жылдық мерейтойы аясында, 2025 жылдың 13 мамырында М. Әуезов атындағы Қазақ ұлттық драма театры аудан әкімінің арнайы шақыртуымен Шардара халқына өнер тартуын жасады. Театр ұжымы көрнекті жазушы Тынымбай Нұрмағанбетовтің «Бес бойдаққа бір той» комедиясын сахналады.
Кештің басты рөлдерін танымал актер Бекжан Тұрысов пен жерлесіміз, Шардара ауданының мақтанышы — актриса Гүлшат Әбсаттарқызы Тутова сомдап, көрермендердің ыстық ықыласына бөленді. Қойылым күлкі мен шынайы эмоцияға толы көріністерімен ерекше әсер қалдырды.
Шара барысында Шардара ауданы әкімінің орынбасары Төребеков Бейсенбай Тасболатұлы актриса Гүлшат Әбсаттарқызына аудан әкімі Арман Романұлы Қарсыбаевтың атынан Алғыс хат табыстап, 60 жылдық мерейтойға арналған естелік төсбелгімен марапаттады. Сонымен қатар, театр директорының орынбасары Серік Мұқанұлы мен актер Бекжан Тұрысовқа қазақы дәстүрмен сый-құрмет көрсетілді.
Бұл шара – мәдени байланысты нығайтып, өнер арқылы рухани жаңғыруға жол ашатын игі бастамалардың бірі болды.
(с) Шардара ауданы әкімдігінің баспасөз қызметі
