«Кибер алаяқтықтың алдын алу, қорғау және жауапкершілік» тақырыбындағы медиа-жоспарға сәйкес, Шардара аудандық полиция бөлімінің криминалдық полиция және жергілікті полиция қызметінің учаскелік инспекторлары тұрғындар арасында интернет алаяқтықтың алдын алу бағытында түсіндіру жұмыстарын жүргізді.
Іс-шараның мақсаты – азаматтардың киберқауіпсіздік жөніндегі білімін арттыру және интернеттегі алаяқтық әрекеттерден сақтандыру.
Кездесу барысында полиция қызметкерлері интернет алаяқтықтың кең тараған түрлері мен әдістерін түсіндірді. Атап айтқанда, фишингтік сайттар, жалған сілтемелер, әлеуметтік желілер арқылы сенімге кіріп алдау, онлайн сатып алу кезінде төлем жасау сылтауымен ақша аударту сияқты әрекеттердің жиі кездесетіні айтылды.
Құқық қорғау өкілдері тұрғындарға жеке және банк деректерін бөгде адамдарға бермеуді, күмәнді сілтемелерге өтпеуді, белгісіз қосымшаларды жүктемеуді және бейтаныс тұлғалармен қаржылық операция жасамауды ескертті. Сондай-ақ интернет арқылы келіп түсетін «банк қызметкеріміз» деген қоңыраулар мен хабарламаларға сенбеу қажеттігі айтылды.
Полицейлер интернет алаяқтықтың құрбаны болған жағдайда бірден банкке хабарлап, есепшотты бұғаттау және полицияға арыздану тәртібін түсіндірді. Мұндай жағдайда барлық дәлелдерді (хабарламалар, төлем түбіртектері, сілтемелер) сақтау маңызды екені атап өтілді.
Киберқылмыстардың алдын алу мақсатында тұрғындарға киберқауіпсіздік ережелері жазылған жадынамалар таратылды. Азаматтар өз кезегінде мұндай шаралардың маңыздылығын атап өтіп, қойылған сұрақтарына нақты жауаптар алды.
Шардара аудандық полиция бөлімінің қызметкерлері түсіндіру жұмыстарының алдағы уақытта да жалғасатынын хабарлады. Мұндай кездесулер мектептерде, колледждерде және еңбек ұжымдарында өткізілмек.
Құқық қорғау органдары азаматтарды интернеттегі кез келген күмәнді хабарламаларға сенбеуге, жеке деректерін қорғауға және күдікті жағдай туындаған сәтте дереу полицияға хабарлауға шақырады.
Киберқауіпсіздік – әр азаматтың жеке жауапкершілігі. Интернеттегі сақтық пен зейін – өз қауіпсіздігіңіздің кепілі.
