Қазақ елі – бір шаңырақ астында көптеген ұлттар мен ұлыстарды біріктіріп отырған ынтымақ пен бірліктің, бейбітшілік пен достықтың мекені. Бұл – жай ғана сөз емес, уақыт пен тарих дәлелдеген ақиқат. Тәуелсіздік алған сәттен бастап Қазақстан өзінің басты байлығы – халқының бірлігін сақтап қалу жолында сан түрлі бастамалар көтеріп, бейбіт өмірдің негізін қалады.
Бүгінгі Қазақстан – қазақ, орыс, өзбек, ұйғыр, татар, неміс, кәріс, дұнған, украин, шешен, ингуш, башқұрт және басқа да көптеген этнос өкілдері бір дастархан басында бас қосып, бір мақсат жолында еңбек етіп жатқан ел. Бұл – Елбасының және қазіргі Мемлекет басшысының дана саясатының, халқымыздың кең пейілі мен сабырлылығының жемісі.
Бүгінгі таңда елімізде 100-ден астам этнос өкілдері өмір сүруде. Әрқайсысы өз ана тілін, дәстүрін, дінін сақтап, сонымен қатар өзін осы елдің бір бөлшегі ретінде сезінеді. Бұл – нағыз патриотизмнің көрінісі. Қазақстан азаматы болу – бұл ұлтқа емес, елге адал болу деген сөз.
