Бүгінде интернет пен цифрлық технологиялардың қарқынды дамуы — бір жағынан үлкен мүмкіндік болса, екінші жағынан алаяқтар үшін кең жол ашып отыр. Халықтың цифрлық сауаттылығының төмендігін пайдаланатын заманауи интернет-алаяқтар күн өткен сайын көбейіп, түрлі айла-тәсілмен азаматтардың жеке мәліметтері мен қаражатын заңсыз иемденуде.
Осыған орай, Шардара ауданы ішкі саясат бөліміне қарасты Жастар ресурстық орталығы КММ-ның бастамасымен «Alayaq.net» жобасы аясында Қоссейт ауылдық округінде алаяқтықтың алдын алуға бағытталған ақпараттық-түсіндіру жұмыстары жүргізілді.
Іс-шара барысында ауыл тұрғындарына интернет алаяқтықтың кең таралған түрлері, әсіресе телефон арқылы ақша жымқыру, фишинг, жалған интернет дүкендер мен инвестициялық жобалар жайында толық мәлімет берілді. Алаяқтардың әрекеттерінен қорғану жолдары түсіндіріліп, ақпараттық үнпарақшалар таратылды.
«Цифрлық сауаттылық – заманауи қоғамдағы маңызды қорғаныс құралы. Интернет алаяқтарының қулығы күн сайын жаңарып отырады. Сондықтан әрбір азамат сақтық шараларын білуі және күмәнді әрекеттерге жол бермеуі тиіс», – делінген ақпараттық түсіндіру парақшаларында.
Шара барысында мамандар тұрғындарға белгісіз сілтемелерге өтпеу, жеке деректерді (ЖСН, банк картасының мәліметтері, SMS-кодтар) ешкімге айтпау, күмәнді қоңырауларға сенбеу сынды қауіпсіздік ережелерін ұстануды ұсынды.
Мұндай ақпараттық іс-шаралар халық арасында интернеттегі қауіпсіздік мәдениетін қалыптастыруға бағытталған және алдағы уақытта да жалғасын табатын болады.
Шардара ауданы ішкі саясат бөлімі
Жастар ресурстық орталығы КММ
