Түркістандық Ерлан Абдиевтің қайсарлығы көпке үлгі. Екі аяғынан жан кетіп, арбаға таңылса да азамат оған еш мойымай, тұңғышынан кейін араға 10 жыл салып егіз балалы болды. Әріптесіміз оның осынау қуанышына куә болып қайтты.
Ерлан Тұрсынбайұлы дәл осы сәтті қанша жыл күтті. Сондықтан өзіне екі бірдей перзент сыйлаған жарын перзентханадан думандатып қарсы алды.
Ерлан Абдиев, қала тұрғыны:
«Бүгін ерекше күн болып тұр. Алла тағаланың берген нығметімен екі баланың әкесі атанып отырмын. Тұңғышымыз 12 жыл бұрын дүниеге келген еді. Одан кейін жарақат алып қалып, балалы болу арман боп қалды. Енді міне Алланың қалауымен бір ұл, бір қыздың әкесі атанып отырмын. Қуаныштымды сөзбен жеткізе алмаймын».
Қазіргі таңда егіздердің денсаулығы жақсы. Ұл – 3 келі 350 грамм болса, қыз 2 келі 740 грамм. Ерлан егіздеріне Баязит, Томирис деп ат қойды. Өзі сияқты қайсар болсын деп ырымдаған. Ал атасы сәбилер ерекше күні дүниеге келді деп қуануда.
Тұрсынбай Абдиев, әкесі:
«Бүгін мен өте қуаныштымын. 12 жылдан бері күтіп жүрген немереміз дүниеге келді. Біреу емес тағы, егіз: бір ұл, бір қыз. Күн мен түннің теңескен күнінде дүниеге келіп отыр. 21 ғасыр, 21 жыл, 21-і – ең ұзақ түн, ең қысқа күн. Өте қуаныштымын. Бұл – менің сегізінші немерем. Біздің тұқымда егіздер болмаған, нағашы жағынан келсе керек».
Айта кетейік, 2012 жылы жол апаты салдарынан Ерланның омыртқасы сынып, белден төмен ешнәрсе сезбей қалған. Әйтсе де «солай болды екен» деп өмірден баз кешіп кетпей, отбасын барынша алға тартып келеді. Қазіргі таңда ол – мүгедектерді әлеуметтік қорғау саласының маманы. Мемлекеттік қызметкерлерге мүгедектермен жұмыс істеу бойынша тегін дәріс оқиды.
