Сарапхана ауыл іргесінен өтетін күре жолдың бойындағы ең көрнекті жерде үш арыс кеңес құрып отыр. Бұл көріністің көрген адамға ой салып, жүрегіне сәуле төгері сөзсіз. Қоладан құйылған еңселі ескерткіштің биіктігі тұғырын есепке алмағанның өзінде 5 метрден асады. Айналдыра салынған қабырға тастарында алаш қайраткерлерінің қанатты сөздері жазылған. Қазығұрт ауданында «Мәңгілік ел» кешенінде Алаш арыстарына ескерткіш қойылды.
Өмірзақ Озғанбаев, қоғам қайраткері:
«Кезінде атылып кеткен асылдар бізді кейінгі ұрпақ ұмытпайды деген ойда өмір сүрген. Расында бүгін ұрпақтары бабаларын ұмытпай ас беріп, ескерткіш орнатып жатыр. Мен бұл жерге жиі келіп тұрамын. Біртіндеп бұл маң аспан астындағы мұражайға айналып келеді».
Жалпы ұлт зиялылары исі қазаққа ортақ. Ал Қазығұрт өлкесі олардың өмір жолымен, саясаткер тұлға ретінде қалыптасумен тығыз байланысты.
Қуаныш Айтаханов, қоғам қайраткері:
«Мәңгілік ел саябағында үлкен бір оқиғаның куәсі болып отырмыз. Алаш арыстары осыдан бір ғасыр бұрын бүкіл саналы ғұмырын тәуелсіздік пен ұлт үшін қиды».
Өткен ғасырдың басында ұлтымыздың бас көтерер азаматтары Алаш идеясының төңірегіне бірікті. Олар елінің азаттығы мен өркендеуі жолында қызмет етті. Халықтың рухын оятып, санасына сілкініс әкелді. Жеріміздің тұтастығының сақталуына ықпал етті.
Бекет Тұрғараев, қоғам қайраткері:
«Біздің бүгінгі бақытты тұрмыс – алаш арыстарының еңбегі. Олардың бәрі тәуелсіздік үшін қызыл империяның қылышына ұрынып қаза болды. Олар біздің дәл бүгінгі күнімізді армандап кетті».
Қоғам қайраткерлері алаштану ғылымының аясында сол дәуірдегі зиялы қауымның еңбегі жан-жақты зерттелуі қажет дейді. Өйткені олар атқарған іс ешқашан маңызын жоғалтпайды. Себебі ұлт мүддесі, ел қамы деген ұғым – мәңгі құндылық.
