Мектепті зейнеткерлер күзетіп жүр. Олар не рация, не құқықбұзушыларды ұстауға қажет бірде-бір құралмен қамтамасыз етілмеген де. Алатындары – айына 70 мың теңге. Сенаторлар осылай дабыл қақты. Осы ретте тілшіміз қаладағы бірнеше білім ошағына барып, балалардың қауіпсіздігін кімдер күзетіп жүргенін көзімен көріп қайтты.
Алпысты алқымдап қалған Закир Гарифуллин – мектеп күзетшісі. Оған дейін тұрақты еш жерде істемеген. Үй сылау, көмір тасу секілді маусымдық жұмыстармен ғана күнелткен. Тіпті спорттан да хабары жоқ. «Жұмысқа қабылдар кезде ешқандай талап қойылған жоқ» дейді ол.
Закир Гарифуллин, күзетші:
«Тірлігіміз сыртта айналамыз. Балаларға қараймыз: төбелесіп жатыр ма, жоқ па деп. Тәртіп бұзып жатқандарды ұстап, ескерту жасаймыз. Бұрын құрылыста істедім. Үш жылдан бері осы жердемін. Жұмыс сұрап келдім, қабылдады. Ешқандай талап қойған жоқ».
Қаладағы басқа бір білім ошағына бас сұққанымда, ол жерден күзет қызметкерлерін таба алмадық. Сөйтсек, онда мектеп қауіпсіздігіне жауаптылар тек кешкі уақытта келеді екен. Ал күндіз ішкі тәртіпке кезекші мұғалім ғана жауапты көрінеді.
Жанәділ Малдыбеков, А.Байтұрсынов атындағы №1 мектеп-лицей мұғалімі:
«Мектебімізде үш қарауыл бекітілген, жұмысқа кешке таяу келеді. Барлығы кезінде бухгалтер болып істеген. Қызметте болған адамдар».
Мектептегі балалар қауіпсіздігі мәселесін сенатор Ақылбек Күрішбаев көтерген еді. Ресейдің Қазан мен Пермь қалаларында болған қанды оқиғаларды негізге алған ол елімізде күзетте отыратындардың көбі егде жастағылар екеніне алаңдаушылық білдірді. Себебі жалақысы 70 мың теңгеден аспайтын бұл қызметке жастар келе бермейді.
Ақылбек Күрішбаев – ҚР Парламент Сенатының депутаты:
«Мектеп пен колледж директорлары жалақының төмендігіне байланысты қауіпсіздік қызметінде тек зейнеткерлер не зейнете шығуға аз қалған адамдар жұмыс істейді деп шағымдануда. Мекемелерді қорғау жөніндегі заңнама талаптарын күшейттік. Оқу орнындағы қаупісіздік қызметін ретке келтірдік деп есеп береміз. Бірақ іс жүзінде мәселе мүлдем шешілмеген. Оқу орындарындағы қауіпсіздік мәсесіне бұдан әрі көз жұма қарауға болмайды. Өйткені таразы басында балаларымыздың өмірі мен денсаулығы тұр».
Түйін: Заң бойынша, елімізде күзетке арнайы лицензиясы бар фирмалар ғана тартылады. Оларды конкурс арқылы таңдайды. Ал тендерде кім төмен баға ұсынады, сол жеңіске жетеді. Ал олар тура осы күзетшіге аз жалақы қояды. Сондықтан сол айлыққа көнген адамдардың жасына қарамай, спортқа бейімі барын да анықтамай жұмысқа қабылдай береді. Осыған байланысты бір топ сенатор ішкі істер министріне, сондай-ақ білім және ғылым министріне депутаттық сауал жолдап, тиісті шара қолдануды талап етті.
