Қазақстан коронавирустың төрт толқынынан өтті. Бұл туралы бүгін үкімет сағатында денсаулық сақтау министрі мәлімдеді. Сонымен қатар Алексей Цой жалған вакцинация паспортын жасайтындарды қалай құрықтап жатқанын жеткізді. Үкімет сағатында көтерілген басқа да мәселелер келесі материалда.
Денсаулық сақтау министрлігі ІІМ күш біріктіріп, вакциналау құжатын табыс көзіне айналдырған ақхалаттыларды анықтауға кіріскен. Нәтижесінде 90-ға жуық қылмыстық іс қозғалды. Оның жартысы жалған ПТР-анықтамасын жасауға байланысты болса, қалған жартысы вакцинация паспортын істеген.
Алексей Цой, ҚР Денсаулық сақтау министрі:
«Соттың шешімі шыға сала, жалған құжаттар базадан алынады. Әр жағдайды қатаң бақылаймыз. Бүгінде әр кабинетке камера қойылған. Одан бөлек, ішкі бақылау бар. Яғни Денсаулық сақтау басқармалары да тексереді. Шыны керек, халыққа бұл өзін-өзі алдау екенін түсіндіруге тырысып жатырмыз»
Елімізде әлі күнге дейін шектеу шараларын қабылдауға құқылы құзырлы орган жоқ. Бұған қоса, санитар дәрігерлер енгізетін шектеулер де түсініксіз. «Өңірлерде эпидемиологиялық ахуал ұқсас болса да, әртүрлі карантиндік шектеулер жарияланады», — деді Мәжіліс депутаты Айгүл Жұмабаева.
Айгүл Жұмабаева, ҚР Парламент Мәжілісінің депутаты:
«Былтыр Төтенше жағдай туралы заң бойынша елде төтенше жағдай режимі жарияланды. ТЖ мерзімі 30 күннен аспайтынына байланысты, осы мерзім аяқталысымен Қазақстан төтенше жағдай режимінен шығып, құқықтық турбуленттік күйіне түсті. Енді бизнес екі жылдай құқықтық алаңнан тыс өмір сүріп жатыр. Өйткені «карантиндік шаралар» ұғымы бірде-бір заңда, бірде-бір нормативтік-құқықтық актіде жоқ».
Ал депутат Жұлдыз Сүлейменова еліміздегі мектептерде енгізілген санитарлық талаптар бала денсаулығына кері әсерін тигізуі мүмкін екенін айтып, алаңдаушылық білдірді. Мысалы, биыл оқушылар дәстүрлі оқу форматына ауысып, «Бір класс – бір кабинет» жүйесі арқылы барлық пәнді бір кабинеттен шықпай оқып жатыр.
Жұлдыз Сүлейменова, ҚР Парламент Мәжілісінің депутаты:
«Бұл принцип балалардың мектепке кіргеннен шыққанға дейін бір бөлмеде отыруын көздейді. Демек, үзіліс кезінде де олардың сыртқа шығуына тыйым салынған. Мұндай талап олардың денсаулығына кері әсерін тигізбей ме? Балалар далаға шықпайды, бұрынғыдай ойнамайды, яғни қозғалмайды».
Ведомство басшысы өз кезегінде бұл мәжбүрлі шара екендігін айтты. Біздегі шектеу шараларының талаптары Дүниежүзілік денсаулық сақтау ұйымынан алынған деді ол.
