Осыдан бір апта бұрын арнамызға жүгінген «Отырар» шағынауданы тұрғындары әлі де ашулы. Кәріз құбыры жарылып, жертөлесі лас суға толған көпқабатты үйлерге содан бері әлі ешбір мекеме көмекке келмеген. «Әне-міне бітіреміз» деген ақжағалылар да жоқ болған. Ендеше, мәселе қашан реттеліп, жертөле тазарады? Алтынбек Әмит баяндайды.
Ұзақ уақыт жатып қалған судың борси бастағаны өз алдына, біртіндеп жертөленің іргетасы шөге бастаған. «Бір аптада барлығын реттейміз», – деп кеткен жауапты сала мамандары ескі скотчты жаңартқаннан басқа түк бітірмеген. Ал тұрғындар лас су дәл осылай жата берсе, қабырғамыз қақырап, шаңырағымыз ортасына түсе ме деп қорқып отыр.
Қуандық Мырзағалиұлы, қала тұрғыны:
«№11 үйдің қасында бойлерный бар, соның жарығын өшіріп кетіп жатыр. Себебі құбырды өткізгенімен, ол жердің электр қуатын ешқандай мекеменің қарамағына өткізбеген. Өйткені энерговетке ақша төленбеген. Сондықтан кәріздің жаман суын тартатын насостар да істемей тұр».
Мәселені шешу үшін тағы да қала әкімдігінің есігін қақтық. Сөйтсек, жертөлені басқан суға әкімдіктің еш қатысы жоқ болып шықты. «Біз қоқыс толған құбырларды ауыстырып, өз міндетімізді атқардық» деген атқамінер жаман суды тазалауға «Түркістан ҚызметСервис» жауапты деп басын ала қашты. Сондай-ақ «құбырдың жарылуына тұрғындардың өздері кінәлі» дегенді қосуды да ұмытпады.
Алмас Байжанов, қалалық құрылыс бөлімі басшысының орынбасары:
«Жертөледегі суды сол жердегі қызмет көрсету мекемесі тазалауы тиіс. Яғни ПИК жауапты. Ол біздің қарамағымызға кірмейді. Бізге тек үйдің қабырғасы құлау сияқты айтарлықтай жағдай болса ғана, келіңіздер. Бірақ осы ретте тұрғындардан кәріз құбырларына тұрмыстық қалдықтар тастамауды сұраймыз. Себебі құбырлар көбіне соның кесірінен жарылып жатады».
Ал, ЖШС басшылары керісінше құрылыс бөлімін кінәлап отыр. Айтуларынша, жертөледегі суды тазалау қыруар қаражатты талап етеді. Ондай ақшаны тұрғындардан жинау үшін келісімшарт жоқ. Ал онсыз елден бір тиын да ала алмаймыз. Сондықтан «әкімдік суды тазартып беруі керек» деп, бізге қайта сонда жөн сілтеді. Ал әрі қарай таза ұстау – біздің мойнымызда дейді олар.
Бақтияр Бердібаев, «Түркістан қызмет сервис» басшысы:
«Әу баста нысанды «Қайназар» ЖШС мекемесі құрылыс бөліміне өткізуі керек. Олар ТҮКШ-ке, ең соңында водоканалға сенімгерлікке өткізуі тиіс. Енді бізге тазалап суды сорып кетсе, біз сол күйінде таза ұстаймыз. Бірақ олар әлі күнге тазартқан жоқ. Егер ертең ылғалды әбден бойына сіңірген қабырғалар құлайтын болса, оған тікелей құрылыс бөлімі кінәлі болады».
Қорытынды: Бір-біріне сілтеп, жауапкершілікті мойнына алудан бас тартқан қос мекеменің қайсібірі кінәлі екенін анықтау – алдағы күннің еншісінде. Әйтсе де жағдайды қала әкімінің өзі шұғыл өз бақылауына алмаса, мәселе жақын арада шешілмейтін секілді. Ал жағдай ушықса, іргетасы ұзақ уақыт бойына борсыған суда қалған көпқабатты тұрғын үйлер құлап, мыңдаған тұрғын далада қалмасына еш кепілдік жоқ.
