Түркістан туризм орталығына айналғалы мүмкіндігі бар адамның бәрі жан-жақтан киелі шаһардың көрікті жерлерін аралауға ағылып келіп жатыр. Ал мүмкіндігі шектеулі азаматтар ше? БҰҰ ұйғарымымен қазан айының үшінші жексенбісі «Мүгедектер күні» деп белгіленген. Осы орайда Төле би ауданының «Атымтай жомарттары» осындай жандарға тамаша тарту жасады.
Бауыржан Абдуллаев – І топ мүгедегі. Білім беру саласында еңбек ететін ол көне қаланың жаңа келбетін көріп, таңданысын жасырмады. Денсаулығында кінәрат болса да, ешқашан соны сылтауратып жұмыстан жалтарып көрмеген жігіт ағасы балаларға тәлім берумен қатар, отбасын өнерге баулып отыр. Тіпті бүгінге дейін бірнеше байқаудың жеңімпазы атанып та үлгерген.
Бауыржан Абдуллаев, қала қонағы:
«2008 жылы оралмандардың «Түркістанды аңсау» этнофестиваліне келген едік. Содан бері 13 жыл дегенде енді ғана келіп тұрмыз. Қала керемет дамып кетіпті».
Талғат Абылаев, қала қонағы:
«Түркістанға келіп тұрамыз. Әр келген сайын өсіп жатыр қала. Өркендеп жатыр. Яссауи мешітіне келдік. Экскурсия жасап келдік. Барлығы әдемі».
Жолдың ұзақтығына байланысты кейбіреулер жанына дәрігерін де ерте келіпті. Ұйымдастырушы Ғалымжан Елшібайдың айтуынша, олар құлпырған қаланы тек теледидардан емес өз көзімен көруі тиіс. Сондықтан басты мақсат – өздігінен үйден ұзап шыға алмайтын айрықша жандарға тарихи орындарды аралатып, көңілін бір серпілту.
Ғалымжан Елшібай, облыстық ҚР Журналистер одағының төрағасы:
«Әлемнің дамыған мемлекеттері қатарына қосылу экономикалық өссіммен ғана өлшенбейді. Сол елдің мүмкіндігі шектеулі азаматтарға, әлеуметтік әлсіз топтарға қаншалықты жағдай жасағанымен де таразылануы тиіс. Жалпы, бас-аяғы 20 шақты адам Түркістанның бүгінгі тамаша дамып жатқанын көріп, куә болып, қуанып ризашылықтарын білдіріп жатыр».
Ерекше жандарға қаланы аралатып, тарихи нысандармен таныстыру алдағы уақытта да жалғасын таппақ. Айта кетейік, Төле би ауданында 5 мыңнан аса мүмкіндігі шектеулі жан бар. Оның 700-ге жуығы 16 жасқа толмаған.
